25 лістапада – Дзень народзінаў палітвязня Аляксандра Казуліна :: Хартыя'97 :: Навiны

25 лістапада спаўняецца 51 год былому кандыдату на прэзідэнта, палітвязню Аляксандру Казуліну. Днямі сваякі атрымалі ад яго ліст, які быў адпраўлены тыдзень таму. Казулін піша, што улады ўчынілі яму “сапраўдную інфармацыйную блякаду”: затрымліваюць ягоную пошту, не дапускаюць да яго адваката. Казулін даслаў скаргу пракурору па наглядзе й начальніку калёніі, але адказу не атрымаў. Пра стан здароўя Аляксандар Казулін, які галадае ужо каля 40 дзён, нічога не напісаў. Ён піша, што не зьбіраецца саступаць і дае рэкамэндацыі адносна выкананьня сваіх патрабаваньняў.

“У гэтым лісьце ён больш падрабязна піша пра тое, што трэба рабіць адносна нелегітымнасьці Аляксандра Лукашэнкі. Ён піша, што ўсё ж трэба зьвяртацца да прэм’ера Сідорскага, бо гэта вызначальныя рэчы, і што Эўразьвяз ды іншыя краіны няправільна робяць, калі дасылаюць сваіх прадстаўнікоў да Аляксандра Лукашэнкі, бо гэтым яны прызнаюць, што ён узначальвае краіну законна”, -- паведаміла “Радыё Свабода” жонка Казуліна Ірына.

У калёніі сваякам нічога не паведамляюць пра здароўе галадоўніка. Казуліну забараняюць сустракацца з адвакатам, яму таксама забароненыя сустрэчы са сваякамі.

25 лістапада сваякі й сябры зьбіраюцца наведаць віцебскую калёнію, дзе трымаюць палітыка, каб перадаць яму цёплыя рэчы, харчы, кнігі й падарункі. Надоечы да эстафэтнай галадоўкі на знак падтрымкі Казуліна далучыліся вядомыя апазыцыянэры Анатоль Лябедзька, Валер Фралоў, Анатоль Ляўковіч і Тацяна Ваніна.

Аляксандр Казулін праводзіць бестэрміновую галадоўку з 20 кастрычніка ў калоніі “Віцьба-3”, дзе адбывае пакаранне. Такім чынам ён пратэстуе супраць “існуючага ў краіне беззаконня” і спрабуе прыцягнуць увагу Рады Бяспекі ААН да сітуацыі ў Беларусі.