Заслужаны юрыст Беларусі: «Фальшаваньне выбараў мусяць дасьледаваць праваахоўныя органы» :: Хартыя'97 :: Навiны

Прызнаньне Аляксандра Лукашэнкі падчас прэсавай канфэрэнцыі для ўкраінскіх журналістаў, што "апошнія выбары мы сфальшавалі", працягваюць камэнтаваць спэцыялісты. Вось меркаваньне заслужанага юрыста Беларусі Валер`я Фадзеева, якое прагучала на “Радыё Свабода”: "Калі быў дадзены загад на фальшаваньне вынікаў выбараў, то незалежна ад таго, у які бок гэта зроблена, фальсіфікацыя ёсьць фальсіфікацыя. За яе трэба адказваць. Існуе адказнасць за парушэньні выбарчага заканадаўства. Відаць, што можа зьявіцца такая ініцыятыўная група. Але самі юрысты ці палітыкі наўрад ці што вырашаць. Трэба, каб працавалі праваахоўныя органы".

Нагадаем, што Аляксандр Лукашэнка падчас прэс-канферэнцыі для ўкраінскіх журналістаў прызнаў, што прэзідэнцкія выбары, якія адбыліся ў сакавіку цяперашняга года, былі сфальсіфікаваныя.

“Апошнія выбары мы фальсіфікавалі. За Лукашэнку прагаласавала 93 з паловай працэнта. Але, кажуць, гэта не еўрапейскі паказчык. Мы зрабілі 86%”, – заявіў А.Лукашэнка. Па яго словах, з боку Еўропы напярэдадні выбараў гучалі абяцанні, што ў выпадку, калі “будзе прыкладна еўрапейскі паказчык на выбарах, выбары будуць прызнаныя”. “Але таксама не атрымалася. Паабяцалі, што прызнаюць, але не прызналі”, – канстатаваў ён.