Чарговы дэкрэт Лукашэнкі парушае Канстытуцыю :: Хартыя'97 :: Навiны

Дэкрэт Аляксандра Лукашэнкі аб дадатковых мерах абароны дзяцей у сем`ях з дрэнным становішчам, які падпісаны 24 лістапада, нельга назваць ні канстытуцыйным, ні годным цывілізаванай дзяржавы, лічыць юрыст Сяргей Балыкін.

“Зразумела, мэта дэкларуецца добрая і праблему вырашаць неабходна, але метады яе рэалізацыі, прадугледжаныя дэкрэтам, нармальнымі не назавеш, – заявіў эксперт у інтэрв`ю БелаПАН. – Напрыклад, дэкрэт прадугледжвае магчымасць пазасудовага адабрання дзяцей па рашэнні камісіі па справах непаўналетніх у бацькоў, якія вядуць амаральнае жыццё, дрэнна ўплываюць на дзяцей, з`яўляюцца хранічнымі алкаголікамі і наркаманамі. Разам з тым артыкул 32-гі Канстытуцыі ўсталёўвае, што дзеці могуць быць аддзеленыя ад сваёй сям`і супраць волі бацькоў толькі па рашэнні суду. Такім чынам, дэкрэт прама супярэчыць Канстытуцыі, хоць яна валодае вяршэнствам нават па дачыненні да актаў прэзідэнта”.

Акрамя таго, як адзначыў эксперт, дэкрэт прадугледжвае прымусовае працаўладкаванне нядбайных бацькоў. “Адзначу, што ў адпаведнасці з Канстытуцыяй праца з’яўляецца менавіта правам, а не абавязкам грамадзяніна, – зазначыў С.Балыкін. – Акрамя таго, шэраг міжнародных пагадненняў, удзельнікам якіх з’яўляецца Беларусь, забараняюць прымусовую працу. Як вядома, прымусовая праца эфектыўнай не бывае, а дэкрэт прадугледжвае яшчэ і кантроль за наведваннем працы нядбайнымі бацькамі з боку праваахоўных органаў. Гэта запатрабуе дадатковых выдаткаў”.

Як адзначыў эксперт, у адпаведнасці з дэкрэтам нядбайных бацькоў прыйдзецца ўладкоўваць на досыць высокааплатную працу. “Дэкрэт прадугледжвае, што заробку такога бацькі павінна хапляць на пакрыццё выдаткаў, звязаных з утрыманнем дзяцей, і яшчэ не менш за 30 % павінна застацца яму самому, – нагадаў эксперт. – Як паведаміў падчас нарады 30 жніўня прэзідэнт Беларусі, на ўтрыманне кінутага дзіцяці дзяржава расходуе каля 120 даляраў у месяц, адпаведна, зарплата бацькі павінна складаць каля 200 даляраў. На такую зарплату згадзіліся б шматлікія добрасумленныя бацькі”.

Цывілізаванае грамадства не павінна паступаць такім чынам нават з самымі прыгнечанымі яго сябрамі, упэўнены эксперт. “Мала таго, што гэта амаральна, так гэта яшчэ і малаэфектыўна эканамічна”, – зазначыў С.Балыкін.

“Цяжка судзіць, чаму кіраўніцтва краіны выдала падобны нарматыўны акт, але здаецца, што ён накіраваны хутчэй не на рашэнне праблемы, а на тое, каб адпомсціць нядбайным бацькам”, – лічыць юрыст.