Пасля працяглай галадоўкі родныя не пазналі Аляксандра Казуліна :: Хартыя'97 :: Навiны

25 лістапада адміністрацыя Віцебскай калёніі “Віцьба-3” ўпершыню дазволіла 15-хвіліннае спатканьне з палітвязьнем Аляксандрам Казуліным для ягонай жонкі Ірыны дачкі Юліі. “Я яго не пазнала, я калі зайшла ў пакой для спатканьняў і пачала шукаць вачыма тату, то прайшла міма… Таму што ён вельмі худы, важыць 70 кіляграмаў, у пачатку галадоўкі ён быў 91 кіляграм. Да турмы – 105”, -- паведаміла “Радыё Свабода” дачка Казуліна Юлія.

Жонка палітвязьня Ірына Казуліна зазначыла, што яе муж цяпер падобны на былога палітвязня Сяргея Скрабца, які нядаўна выйшаў з віцебскай турмы, – такі ж худы.

Адміністрацыя дапусьціла родных з мэтай, каб яны ўгаварылі Казуліна спыніць галадоўку. Але гэта ім не ўдалося,-- паведаміла Юлія Казуліна.

“Я зразумела, што ён настроены вельмі сур’ёзна, ён сказаў, што будзе галадаваць столькі, колькі патрэбна, незалежна ад таго, наколькі гэта будзе небясьпечна для яго жыцьця”, -- сказала дзяўчына

Юлія Казуліна паведаміла, што ў гонар свайго дня народзінаў яе бацька выставіў іншым зьняволеным вядро гарбаты з цукеркамі. А сам піў ваду.

Аляксандар Казулін галадае з 20 кастрычніка, ён выказвае пратэст супраць незаконнага, на ягоную думку, знаходжаньня пры ўладзе А. Лукашэнкі і дамагаецца разгляду беларускага пытаньня ў ААН ды яднаньня беларускай апазыцыі.

Разам з Ірынай і Юліяй Казулінай у Віцебск езьдзілі паплечнікі А. Казуліна.