Аляксандра Казуліна могуць перавесці ў турэмны шпіталь у Менску :: Хартыя'97 :: Навiны

Экс-кандыдат у прэзідэнты Беларусі Аляксандр Казулін, які 40-ы дзень галадае ў віцебскай выпраўленчай калоніі, скаргаў на здароўе і просьбаў аб шпіталізацыі не выказвае, заявіў “Інтэрфаксу” намеснік начальніка дэпартамента выканання пакаранняў МУС Беларусі Юрый Баранкоў. Аднак, па яго словах, “медыкі ацэньваюць стан А.Казуліна як сярэдне цяжкі, блізкі да здавальняючага, і гатовыя аказаць яму ўвесь комплекс неабходнай медыцынскай дапамогі”.

Ю.Баранкоў паведаміў, што “за час галадоўкі А.Казулін страціў каля 20 кг, і ў яго назіраюцца характэрныя сімптомы працяглай галадоўкі – загусценне крыві і пах ацэтону ад цела”. Намеснік начальніка ДВП таксама праінфармаваў, што ў “мінулы панядзелак у выпраўленчую калонію, дзе адбывае пакаранне А.Казулін, выязджаў начальнік медыцынскай часткі ДВП МУС Васіль Завадскі, які аглядзеў А.Казуліна”. “А.Казулін згадзіўся на ўжыванне да яго метадаў інтэнсіўнай тэрапіі ў выпадку страты прытомнасці”, – паведаміў Ю.Баранкоў. Ён таксама паведаміў, што “А.Казуліна штодня аглядаюць медыкі, ён не адмаўляецца ад лабараторных даследаванняў яго арганізма”.

“На выпадак неабходнасці ў выпраўленчай калоніі ёсць глюкоза для нутравеннага ўвядзення, бялок. Калі ўзнікне неабходнасць, А.Казулін будзе пераведзены альбо ў адну з абласных медыцынскіх устаноў, альбо ў турэмны шпіталь у Менску”, – сказаў суразмоўца агенцтва. Разам з гэтым ён падкрэсліў, што “ніхто прымусова яго карміць не будзе, гэта забароненае законам”.

Ён таксама прапанаваў, што “А.Казуліну дазволена часцей за іншых зняволеных прымаць душ, што з`яўляецца адным з асноўных правілаў працяглага галадання, акрамя гэтага ён практычна ўвесь светлы час сутак знаходзіцца на свежым паветры ў адмыслова адведзеным месцы на тэрыторыі калоніі і не працуе”.

За 8 месяцаў зняволення палітвязень страціў 30 кілаграмаў вагі і знаходзіцца ў вельмі цяжкім стане. Палітык заяўляе, што не спыніць галадоўку, пакуль не будзе выкананая асноўнае яго ўмова – разгляд сітуацыі ў Беларусі ў Радзе Бяспекі ААН.