Амбасада Францыі: Адмова беларускім спартсменам у візах была абгрунтаванай :: Хартыя'97 :: Навiны

Амбасада Францыі ў Беларусі лічыць, што адмова Іспаніі выдаць беларускім спартсменам візы для паездкі ў Барселону была абгрунтаванай. Аб гэтым гаворыцца ў заяве для прэсы, разгледжанай дыпмісіяй 27 лістапада. Гаворка ідзе аб нявыдачы амбасадай Францыі віз сябрам нацыянальнай зборнай Беларусі па футзале для паездкі на чэмпіянат Еўропы ў Барселону.

Каментуючы абвінавачванні ў свой адрас, якія прагучалі ў эфіры Першага канала беларускага тэлебачання, французская дыпмісія нагадвае, што на тэрыторыі Беларусі яна выдае візы ў Іспанію выключна з дазволу іспанскіх улад, перадае БелаПАН. У выпадку з групай беларускіх спартсменаў консульская служба амбасады не атрымала дазволу ад іспанскага боку на выдачу віз. Амбасада заяўляе, што яна “не абавязаная ведаць аб чынніках адмовы, але не сумняваецца ні на хвіліну ў тым, што адмова была абгрунтаванай, і цалкам з ёй салідарная”.

Як адзначаецца ў заяве дыпламатычнага прадстаўніцтва, МЗС і Міністэрства спорту і турызму Беларусі былі паінфармаваны “у рэжыме рэальнага часу” аб развіцці сітуацыі з выдачай віз беларускай зборнай. Францыя ў гэтай сітуацыі не толькі не чыніла перашкод, а, насупраць, спрабавала дапамагчы беларускаму боку. Такім чынам, гаворыцца ў заяве амбасады, беларускае тэлебачанне падало сваім гледачам скажоную інфармацыю.