Генеральны сакратар Саюза журналістаў Расеі: «Гэта проста непрыстойна» :: Хартыя'97 :: Навiны

Тое, што дазволілі сабе беларускія ўлады па дачыненні да расейскіх журналістаў, проста непрыстойна – аб гэтым “Эхо Москвы” заявіў генеральны сакратар Саюза журналістаў Расеі Ігар Якавенка. У той жа час ён вельмі рады, што ў гэтай сітуацыі ўсе расейскія журналісты выказалі салідарнасць.

“Непрыкрытым хамствам” назваў дзеянні беларускіх улад генеральны сакратар Саюза журналістаў Расеі Ігар Якавенка. “Тое, што адбылося ў Менску, сведчыць аб тым, што існуюць краіны, дзе ўлада па дачыненні да журналістаў паводзіць сябе яшчэ больш непрыстойна, чым расейская, – адзначыў ён у эфіры радыёстанцыі “Эхо Москвы”. – Нягледзячы на тое, што ў Расеі, як і ў Беларусі, няма свабоды слова, расейскія ўлады імкнуцца выконваць хоць бы бачнасць прыстойнасцяў, таму расейскія журналісты з непрывычкі здзівіліся”.

Па меркаванні І.Якавенкі, дзеянні афіцыйнага Менска па дачыненні да расейскіх журналістаў часткова выкліканыя тым, што “ніхто, у тым ліку і Беларусь, не шануе членствам у СНД”. “Калі б Менск шанаваў сваім членствам у СНД, то не вёў бы сябе так па-хамску, а прытрымліваўся хоць нейкіх правіл прыстойнасці”, – зазначыў ён. Гаворачы аб рашэнні расейскіх журналістаў пакінуць саміт, кіраўнік Саюза журналістаў адзначыў, што яму “вельмі прыемна, што ў расейскіх журналістаў спрацаваў інстынкт карпаратыўнай салідарнасці”.

Аб усім, што адбылося апавешчаная прэс-служба прэзідэнта Пуціна.

Зрэшты, магчыма, што без удзелу самой прэс-службы ў гэтым скандале не абыйшлося.

Сакратар Саюза журналістаў Міхаіл Фядотаў мяркуе, што акцыя расейскіх журналістаў не што іншае, як адна з форм ціску на Аляксандра Лукашэнку.