«Барацьба» з карупцыяй усё ўзмацняецца :: Хартыя'97 :: Навiны

На паседжанні калегіі пракуратуры Беларусі ўсхвалены праект Дзяржаўнай праграмы па ўзмацненні барацьбы з карупцыяй на 2007-2010 гады, паведамілі “Інтэрфаксу” у сераду ў рэспубліканскай пракуратуры. “На паседжанні калегіі рэспубліканскай пракуратуры, якое адбылося сёння ў Менску, усхвалены праект Дзяржпраграмы барацьбы з карупцыяй на бліжэйшыя пяць год”, – паведамілі ў пракуратуры.

Як паведаміў на прэс-каферэнцыі генеральны пракурор Беларусі Пётр Міклашэвіч, “дадзены праект Дзяржпраграмы падрыхтаваны з улікам новага закона “Аб барацьбе з карупцыяй”.

“Комплекс мер, прадугледжаных праектам Дзяржпраграмы, заснаваны на аналізе крымінагеннай сітуацыі ў краіне, зменах у структуры карупцыйнай злачыннасці, практыцы барацьбы з карупцыяй і выніках навуковых даследаванняў”, – адзначыў генпракурор. Ён таксама адзначыў, што “Дзяржпраграма накіраваная на абарону правоў і законных інтарэсаў грамадзянаў і дзяржавы ад карупцыйных праяў, далейшае ўдасканаленне нарматыўнай прававой базы па папярэджанні, выяўленню і спыненню карупцыйных праяў, аптымізацыю формаў, сродкаў і метадаў процідзеяння карупцыі, пашырэнне міжнароднага супрацоўніцтва Беларусі ў сферы барацьбы з карупцыяй”.

Ён таксама паінфармаваў, што за 9 месяцаў цяперашняга года пракуроры перадалі ў суды 650 крымінальных спраў за карупцыю і хабарніцтва, усяго ў гэтым годзе органамі ўнутраных спраў, камітэтам дзяржаўнай бяспекі і пракуратурай узбуджана каля 3 тысяч крымінальных спраў за хабары і карупцыю.