На 42-гі дзень галадоўкі Аляксандр Казулін важыць усяго 67 кілаграмаў :: Хартыя'97 :: Навiны

Экс-кандыдат у прэзідэнты Беларусі, палітвязень Аляксандр Казулін на 42-гі дзень галадоўкі важыць 67 кілаграмаў. Аб гэтым прэс-цэнтру Хартыі’97 паведаміла жонка палітвязня Ірына Казуліна. Такім чынам, за 8 месяцаў зняволення Аляксандр Казулін страціў 38 кілаграмаў, улічваючы, што да арышту ён важыў 105 кілаграмаў. “Я тэлефанавала сёння ў калонію, мне паведамілі, што Аляксандр важыць ужо 67 кілаграмаў, у яго вельмі нізкі ціск. Медыкі за ім назіраюць, гавораць, што стан здароўя пакуль здавальняючы, муж па-ранейшаму адмаўляецца ад шпіталізацыі. Я вельмі спадзяюся, што ён пачне выходзіць з галадоўкі. Гэта становіцца вельмі небяспечным”, – паведаміла прэс-цэнтру Хартыі’97 Ірына Казуліна.

Нагадаем, што галоўнае патрабаванне галадаючага – разгляд сітуацыі ў Беларусі ў Радзе Бяспекі ААН. Ірына Казуліна наведала ўчора амбасаду Францыі і Нямеччыны, дзе прасіла дыпламатаў звярнуцца да сваіх урадаў з просьбай паўплываць на разгляд беларускага пытання ў ААН.

Сёння Ірына Казуліна мае намер наведаць амбасаду ЗША ў Менску. “Вельмі спадзяюся, што гэта дапаможа”, – гаворыць жонка экс-кандыдата ў прэзідэнты.

Нагадаем, што Аляксандр Казулін галадае з 20 кастрычніка. На час галадоўкі яму забароненыя сустрэчы з адвакатам.