Аляксандра Мілінкевіча будуць судзіць :: Хартыя'97 :: Навiны

Лідэр аб’яднаных дэмакратычных сіл Беларусі Аляксандр Мілінкевіч быў учора вызвалены пасля складання ў дачыненні яго адміністрацыйнага пратаколу за “наўмысны пераход мяжы па фальшывых дакументах”. Па гэтым артыкуле Мілінкевічу пагражае да двух месяцаў арышту або буйны штраф.

Лідэр апазіцыі быў затрыманы ўчора каля 17.00 у Нацыянальным аэрапарту “Менск”, калі вяртаўся з Рыгі з саміту НАТА, па падазроне ў падаванні фальшывых дакументаў. Высвятлілася, што калі лідэр дэмакратычных сіл некалькі дзён назад ляцеў у сталіцу Латвіі, ён па памылцы аддаў беларускім памежнікам не свой пашпарт, а пашпарт свайго сына – таксама Аляксандра Мілінкевіча, але 1974 года нараджэння. Пашпарт сына аказаўся ў Мілінкевіча выпадкова і ляжаў у адной кішэні разам з ягоным. Памежнікі па халатнасці не звярнулі ўвагі, што ўладальнік пашпарта на 25 гадоў старэйшы за паказаны ў дакуменце ўзрост, што ў пашпарце нават няма латвійскай візы, паставілі ў ім штамп. Аляксандр Мілінкевіч выявіў, што яму паставілі штамп у пашпарце сына толькі ў Рызе.

Нягледзячы на тое, што ў дадзеным выпадку відавочная віна супрацоўнікаў памежнай службы, якія не праверылі належным чынам дакументы, у дачыненні Мілінкевіча склалі адміністрацыйны пратакол. Палітык быў вызвалены каля 21.00. Нагадаем, ён прыляцеў у Менск прыкладна ў 17 гадзін.

Мілінкевіч ўдзельнічаў у Рызе ў саміце НАТА па запрашэнні прэзідэнта Латвіі Вайры Віке-Фрейбергі. Падчас саміту з ім сустрэўся прэзідэнт ЗША Джордж Буш.