Самая дарагая зямля ў Менску, самая танная – у Чарнобыльскай зоне :: Хартыя'97 :: Навiны

Старшыня Дзяржкаммаёмасць Беларусі Георгій Кузняцоў адзначае значны рост кошту зямельных участкаў у апошнія 5-6 гадоў. “Квадратны метр зямлі ў цэнтры Менска сёння каштуе 250 даляраў. У Шабанах – 17 даляраў, квадратны метр зямлі ў Шчамысліцах і Бараўлянах дасягае 25 даляраў”, – паведаміў Кузняцоў, адказваючы на пытанні “дэпутатаў”.

Па яго словах, “нарматыўная цана участка ў 15 сотак у Шчамысліцах складае Br15 млн, пры тым, што на чорным рынку кошт 1 соткі такога ўчастку дасягае 500-700 даляраў". "У нас дзейнічаюць сіндыкаты па перапродажы зямельных участкаў", – заявіў Кузняцоў. Ён прывёў у прыклад пасёлак Калодзішчы, дзе "цэлыя палігоны былі прададзеныя пазапраўна". “Спалілі ўсе дакументы, выкралі кампутар, прадавалі зямлю, выкарыстоўваючы старыя пячаткі і бланкі (мясцовых распарадчых органаў улады – ІФ)”, – распавёў Р.Кузняцоў. Па яго словах, “сёння узбуджаная крымінальная справа, фігурантам якой з’яўляецца в.а. старшыні сельсавета”.

Р.Кузняцоў таксама прывёў параўнальную цану соткі зямлі ў розных рэгіёнах рэспублікі – “у сталіцы кадастравая цана соткі складае ад Br2,3 млн да Br15 млн, у Віцебску – ад Br200 тыс. да Br1 млн, у Лунінце ад Br100 тыс. да Br280 тыс., у Оршы – ад Br35 тыс. да Br250 тыс., у Глускім раёне ад Br2 тыс. да 25 тыс., у Рагачоўскім – ад Br2 тыс. да Br88 тыс. Самая танная зямля ў Брагінскім раёне ад Br2 тыс. да Br8,6 тыс.”.

Акрамя таго, зямля можа набывацца па льготнай цане. Так, у Менску льготная цана за сотку зямлі складае ўсяго Br28,9 тыс. У Брагінскім раёне льготная цана адной соткі складае Br1,3 тыс. Ільготная цана складае пяціразовую стаўку зямельнага падатку. Па ёй зямлю могуць набываць грамадзяне, якім неабходнае паляпшэнне жыллёвых умоў.