У Беларусі не будзе ўпаўнаважаных па правах дзіцяці :: Хартыя'97 :: Навiны

Міністэрства адукацыі Беларусі не мае намеру ініцыяваць увядзенне ў рэспубліцы інстытута ўпаўнаважаных па правах дзіцяці. Аб гэтым сёння, адказваючы на пытанні “дэпутатаў” на пленарным паседжанні пятай сесіі “палаты прадстаўнікоў”, заявіла намесніца Міністра адукацыі Таццяна Кавалёва.

Яна адзначыла, што на сённяшні дзень кантроль за абаронай правоў дзіцяці ў рэспубліцы здзяйсняюць два вельмі дзейсных механізмы. У першую чаргу, гэта органы аховы дзяцінства, створаныя ў сістэме органаў апекі і апякунства.

Таццяна Кавалёва прызнала, што на сённяшні дзень дадзеныя органы ў кадравым плане і якасна і колькасна знаходзяцца на нядосыць добрым узроўні і нават не дасягаюць узроўня аналагічных органаў савецкага перыяду. У сувязі з гэтым, па яе меркаванні, у першую чаргу неабходна стварыць паўнавартасную сістэму органаў аховы дзяцінства.

Другім механізмам з’яўляецца Нацыянальная камісія па правах дзіцяці. Яе функцыі, абавязкі і правы значна пашыраныя, і камісія па характары сваёй дзейнасці стала максімальна набліжаная да інстытута ўпаўнаважаных па правах дзіцяці.

Намесніца міністра не выключыла магчымасці стварэння падобнага інстытута ў Беларусі ў будучыні. Але на дадзены момант, па яе словах, “нам неабходна адбудаваць тое, што мы ўжо стварылі”.