Італьянскі дэпутат прапаноўвае сябе беларускім уладам у якасці гаранта :: Хартыя'97 :: Навiны

Дэпутат ніжняй палаты італьянскага парламента, старшыня парламенцкай камісіі па правах дзяцей Лючыа Барані накіраваў ліст амбасадару Беларусі ў Італіі Аляксею Скрыпке. Па паведамленні італьянскіх СМІ, Л.Барані прапанаваў сябе ў якасці гаранта пры вырашэнні сітуацыі з Вікай Мароз і сям’ёй Джуста-Барначын.

У сваім лісце дэпутат падкрэсліў, што падтрымлівае патрабаванні беларускага боку падаць гарантыі вяртання беларускіх дзяцей на радзіму пасля адпачынку ў Італіі.

“Але памылкова ўжываць гісторыю з дзяўчынкай Вікай як прыладу для ціску на тыя 20 тысяч італьянскіх сем’яў, якія знаходзяцца ў спісах кандыдатаў на міжнароднае ўсынаўленне”, – піша парламентар.

Ён выказвае заклапочанасць з нагоды таго, што пры правядзенні беларуска-італьянскіх перамоваў аб далейшых праграмах прыёму беларускіх дзяцей-сірот у Італіі жаданне Вікі Мароз жыць у гэтай краіне з людзьмі, якіх яна заве маці і татам, можа адысці на другі план, паведамляе БелаПАН.