«Газпром» праігнараваў пагрозы Лукашэнкі :: Хартыя'97 :: Навiны

Нягледзячы на пажаданні беларускага ўрада, расейская газавая манаполія мае намер павялічыць кошт газу для Беларусі ў 4,3 разы. У той жа час раней першы намеснік старшыні беларускага ўрада Уладзімір Сямашка заявіў, што Беларусь гатовая да павелічэння кошту расейскага газу на 10-15%.

Як паведамляе газета “Ведомости”, “крыніца з асяроддзя Лукашэнкі здзіўленая, што “Газпром” ужо заклаў у бюджэт суму $200, бо дамоўленасці аб цане яшчэ няма”. Праект бюджэта на 2007 год “Газпром” падрыхтаваў на базе сярэднеўзважанай экспартнай цаны на газ у $293 за тысячу кубаметраў. Разам з гэтым у фінансавы план “Газпрома” на 2006 год была закладзеная цана $257 за тысячу кубаметраў.

У “Газпроме” упэўненыя ў дакладнасці сярэднеўзважанай цаны на газ, якая была пакладзеная ў аснову праекту бюджэту кампаніі на 2007 год. “Мы ўжо дакладна ведаем, якія цэны на газ будуць у Еўропе да сярэдзіны наступнага года, і таму ўпэўненыя ў нашых разліках”, – заявіў прадстаўнік “Газпрома”.

Кіраўніцтва газавай манаполіі спадзяецца атрымаць у 2007 годзе $6,3 млрд. ад продажу 30,5 млрд. кубаметраў газу ў СНД (без уліку паставак ва Украіну). Пры гэтым атрымаць $4,1 млрд. ад паставак газу ў Беларусь (у выпадку продажу па цане $200 за тысячу кубаметраў). У цяперашні час Беларусь атрымоўвае расейскі газ па цане $46,68 за тысячу кубаметраў. Аб гэтым паведамляе Telegraf.by.