Беларускія архівы Радзівілаў увайшлі ў праект ЮНЭСКА «Памяць свету» :: Хартыя'97 :: Навiны

Беларускія архівы знакамітага роду Радзівілаў увайшлі ў праект ЮНЭСКА “Памяць свету”. Аб гэтым распавёў на міжнароднай канферэнцыі “Праграма ЮНЭСКА “Памяць свету”: дзейнасць бібліятэк, архіваў, музеяў па захаванні культурнай спадчыны” прадстаўнік польскай галіны роду – Мацей Радзівіл.

Па яго словах, Беларусь уваходзіць у праграму “Памяць свету” з праектам “Нясвіж – культурны цэнтр Еўропы і нацыянальны помнік”. У рамках праекту ствараецца электронны банк дадзеных, у які будуць уключаныя ўсе дакументы з архіва Радзівілаў. “Ваша краіна валодае значнай часткай нясвіжскага збору – тут захоўваецца больш за 28 тыс. адзінак гістарычных дакументаў, кніг, рукапісаў. Прыкладна такі ж аб`ём інфармацыі ёсць у Польшчы, малазначныя, але таксама вельмі важныя рукапісы засталіся ў Літве, Расеі і Ўкраіне. Усе гэтыя краіны аб`ядналі намаганні і ствараюць агульны віртуальны варыянт архіва”, – адзначыў суразмоўца.

“Дакументальная спадчына не павінна быць прадметам спрэчак і рознагалоссяў, а элементам плённага супрацоўніцтва краін. Такі архіў дазволіць людзям больш пазнаць не толькі аб гісторыі роду, але і аб гісторыі краін, у якіх жылі яго прадстаўнікі”, – лічыць Мацей Радзівіл.