Удзельніку намётавага мястэчка не далі абараніць дысертацыю аб беларускіх партызанах :: Хартыя'97 :: Навiны

Актывіста Аб`яднанай грамадзянскай партыі Дзяніса Сталяра “папрасілі” сыйсці з аспірантуры Беларускага дзяржаўнага педагагічнага ўніверсітэта. Дзяніс Сталяр быў актыўным удзельнікам акцый пратэсту супраць фальсіфікацыі вынікаў прэзідэнцкіх выбараў у сакавіку 2006 года, начаваў у намётавым мястэчку на Кастрычніцкай плошчы.

Кіраўніцтва БДПУ прапанавала Дзянісу сыйсці “па ўласным жаданні” – ціха і не паднімаючы шуму. У адваротным выпадку, заявіў навуковы кіраўнік Дзянісу Сталяру, ён можа ніколі не абараніць ва ўніверсітэце сваю дысертацыю. Аб чынніках такіх адносінаў нічога сказана не было. Проста намякнулі – “улез туды, куды не варта”.

Аспірант рыхтаваў дысертацыю на тэму “Камандны састаў партызанскіх фармаванняў у Баранавіцкай вобласці”. Зараз Дзяніс звярнуўся ў Камітэт дапамогі рэпрэсаваным “Салідарнасць”, спадзяецца на працяг вучобы ў ЕДУ у Вільні, а дысертацыю будзе пісаць у вольны час, спадзяючыся, што ён яе ўсёткі абароніць у Беларусі.