43 дзень галадоўкі. Ірына Казуліна звярнулася да генеральнага пракурора :: Хартыя'97 :: Навiны

Сёння жонка экс-кандыдата ў прэзідэнты Беларусі, палітвязня Аляксандра Казуліна звярнулася да генеральнага пракурора Беларусі Пятра Міклашэвіча з заявай, у якой паінфармавала службоўца аб забароне на сустрэчы зняволенага А.Казуліна з адвакатам. Ірына Казуліна просіць генпракурора ацаніць дзеянні адміністрацыі калоніі, якая пазбаўляе юрыдычнай дапамогі зняволенага, што галадае ў калоніі ўжо 43 дні. Аб стане здароўя палітвязня вядома толькі са слоў кіраўніцтва калоніі. Па апошніх дадзеных, Казулін важыць усяго 67 кілаграмаў (да зняволення яго вага складала 105 кілаграмаў), у яго вельмі нізкі ціск.

Нагадаем, што 22 лістапада дачцэ палітвязня Юліі Казулінай у адказ на заяву з просьбай дазволіць бацьку сустракацца з адвакатам, быў накіраваны ліст, дзе адміністрацыя калоніі матывуе свае дзеянні наступным чынам:

“... Значная страта вагі і стан здароўя патрабуюць суправаджэння Казуліна па тэрыторыі ўстановы, а абавязковая прысутнасць медыцынскага працаўніка робіць немагчымай прыватнасць сустрэчы. Галадоўка, якая праводзіцца Казуліным А.У., выклікае заклапочанасць у адміністрацыі за яго стан здароўя, накладвае дадатковую адказнасць на кіраўніцтва калоніі за забеспячэнне правапарадку ў дадзены перыяд. Сустрэчы асуджанага Казуліна з адвакатам прыпыненыя выключна з-за стану здароўя падабароннага”.

Аналагічны ліст атрымаў з калоніі і з Дэпартамента выканання пакаранняў адвакат Ігар Рынкевіч.

Казулін галадае з 20 кастрычніка. Галоўнае патрабаванне галадоўшчыка – разгляд сітуацыі ў Беларусі ў Радзе Бяспекі ААН.