Беларуская апазіцыя заклікае ўлады абмеркаваць прапановы ЕЗ :: Хартыя'97 :: Навiны

Нацыянальны Камітэт аб’яднаных дэмакратычных сіл разглядае пасланне Еўрапейскага Звяза як важную ўмову для пачатку агульнанацыянальнага дыялогу ў краіне, заявіў кіраўнік Нацыянальнага Камітэта, лідэр Аб’яднанай грамадзянскай партыі Анатоль Лябедзька. Ён накіраваў на імя прэм’ер-міністра Сяргея Сідорскага і кіраўніка адміністрацыі прэзідэнта Генадзя Невыгласа зварот з прапановай стварыць сумесную працоўную групу і абмеркаваць прапановы ЕЗ і магчымыя шляхі іх рэалізацыі.

Каментуючы гэтую ініцыятыву, Анатоль Лябедзька адзначыў, што пасланне ЕЗ звернутае не толькі да ўлады, але і да ўсіх грамадзянаў краіны. “Яно закранае практычна кожнага, – лічыць Анатоль Лябедзька. – А гэта значыць, трэба прымаць калектыўнае рашэнне. Манаполія або табу тут непрымальныя. Неабходная публічная агульнанацыянальная дыскусія на тэлебачанні і ў друкаваных выданнях. Гэта сапраўды тая ледзьве прыкметная сцяжынка, па якой можна пачаць рух у бок, процілеглы канфрантацыі, варожасці і расколу”.

Нацыянальны Камітэт мае намер азнаёміць жыхароў Беларусі з прапановамі Еўрапейскага Звяза. “У людзей павінна быць права выбару. Нескажоная і пэўная інфармацыя дапаможа зрабіць усвядомлены выбар”, – падкрэсліў, як паведамляе прэс-служба АГП Анатоль Лябедзька.