Пратэстанцкаму пастару пагражаюць за крытыку ўлад :: Хартыя'97 :: Навiны

На працягу года пастара царквы “Благодать Иисуса” (Крупкі, Мінская вобласць) Саюза хрысціянаў веры евангельскай у Рэспубліцы Беларусь Мікалая Барычэўскага службоўцы тройчы выклікалі на размовы, патрабуючы спыніць крытычныя выказванні ў адрас улад.

Як паведаміў М.Барычэўскі ў інтэрв`ю БелаПАН, у адваротным выпадку яму пагражаюць ліквідацыяй суполкі. Па яго словах, першая гутарка з ім мясцовых службоўцаў адбылася напярэдадні прэзідэнцкіх выбараў 2006 года. “Другая гутарка, у якой удзельнічалі чатыры чалавекі, у тым ліку намеснік старшыні райвыканкама Уладзімір Загорскі, адбылася 23 лістапада і запісвалася на дыктафон. А 30 лістапада да мяне дадому прыехалі супрацоўнікі Крупскага РАУС. Яны паказалі мне паведамленне з упраўлення КДБ па Менскай вобласці, у якім органам унутраных спраў Крупскага раёна рэкамендуецца ўжыць да мяне меры адміністрацыйнага ўздзеяння ў сувязі з тым, што “грамадзянін Барычэўскі, які прапісаны ў Менску, пражывае ў горадзе Крупкі без прапіскі”. На маё пытанне аб чынніках такой нечаканай увагі да маёй сціплай асобы з боку праваахоўных органаў мне растлумачылі, што паступае інфармацыя аб маіх выказваннях супраць дзеючай улады. У гэты ж дзень мяне даставілі ў РАУС, дзе склалі адміністрацыйны пратакол за пражыванне ў Крупках без прапіскі. Гэты дакумент я адмовіўся падпісаць”, – сказаў пастар.

Па яго словах, ён прапісаны ў Менску, аднак з 1997 года жыве ў Крупках, дзе нясе служэнне пастара. У 1994 годзе царква была зарэгістраваная і пабудавала малітоўны дом. Царква валодае пяццю зарэгістраванымі філіямі ў Крупскім раёне.