Саюз левых партый не можа правесці ўстаноўчы з’езд у Беларусі :: Хартыя'97 :: Навiны

Устаноўчы з’езд Саюза левых партый адбудзецца за межамі Беларусі. Аб гэтым БелаПАН паведаміў лідэр Партыі камуністаў Беларускай (ПКБ) Сяргей Калякін. Гэтае мерапрыемства павінна было прайсці ў Менску 17 снежня. У Саюз левых партый увойдуць тры структуры – ПКБ, Беларуская сацыял-дэмакратычная партыя (Грамада) і Беларуская партыя жанчын “Надзея”. Па словах С.Калякіна, арганізатары з`езду дамовіліся аб арэндзе 17 снежня памяшкання ў Доме культуры МТЗ. Аднак калі напярэдадні яны прыехалі туды, каб аплаціць арэнду залы, кіраўніцтва ДК заявіла, што ўсе дні ў іх ужо занятыя, і адмовіла ў падаванні памяшкання.

“Безумоўна, гэта палітычнае рашэнне. Па наяўнай інфармацыі, яно прымалася ў ідэалагічным упраўленні Адміністрацыі прэзідэнта”, – сказаў С.Калякін. Палітык адзначыў таксама, што ўжо не першы раз, калі беларускія ўлады “прымаюць антызаконнае і антыканстытуцыйнае рашэнні”, якія абмяжоўваюць дзейнасць зарэгістраваных у Міністрэстве юстыцыі палітычных структур.

“Відавочна, яны мяркуюць, што мы зараз кінемся шукаць новае памяшканне. Але мы бачым, што рабіць гэта бессэнсоўна. Таму не будзем губляць час. Калі нам у Беларусі не даюць займацца законнай дзейнасцю, мы правядзем устаноўчы з`езд у каго-небудзь з нашых суседзяў”, – сказаў С.Калякін.