Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Аляксандр Казулін схуднеў на 40 кілаграмаў 12:28, 04/12/2006
На 46-ы дзень галадоўкі стан здароўя экс-кандыдата ў прэзідэнты Беларусі, палітвязня Аляксандра Казуліна значна пагоршыўся. Аб гэтым прэс-цэнтру Хартыі’97 паведаміла жонка палітвязня Ірына Казуліна, якая сёння размаўляла па тэлефоне з выканаўцай абавязкаў начальніка выпраўленчай калоніі “Віцьба-3” Русланам Прыймакам. Па словах Ірыны Казулінай, ейны муж сёння важыць 65 кілаграмаў. Такім чынам, за 8 месяцаў зняволення палітык страціў 40 кілаграмаў вагі (да арышту ён важыў 105 кілаграмаў). Ціск у галадоўшчыка ніжэй за паказчыкі мінулых дзён – 75/60. Тым не менш Казулін працягвае галадоўку.
Медыкі лічаць, што такая страта вагі крытычная, і сур`ёзна асцерагаюцца за ягонае жыццё. Наколькі вядома, Аляксандр Казулін дагэтуль адмаўляецца ад шпіталізацыі, але ён вызвалены ад працы ў калоніі. На час галадоўкі палітвязню забаранілі сустракацца з адвакатам.
Нагадаем, што Аляксандр Казулін галадае з 20 кастрычніка. Галоўнае патрабаванне галадоўшчыка – разгляд сітуацыі з парушэннем правоў чалавека ў Беларусі ў Радзе Бяспекі ААН.
Жонка Аляксандра Казуліна звярнулася да міжнароднай супольнасці з заклікам паўплываць на разгляд беларускага пытання ў ААН. “Людзі свету! У вашых руках жыццё майго мужа...” – заклікае Ірына Казуліна.
