Аляксандра Мілінкевіча затрымалі ў Белаазёрску :: Хартыя'97 :: Навiны

Лідэр дэмакратычных сіл Беларусі Аляксандр Мілінкевіч быў затрыманы ў горадзе Белаазёрску Берасцейскай вобласці. Аўтамабіль, у якім ехаў лідэр апазіцыі, яго прэс-сакратар Павал Мажэйка і кіраўнік менскай абласной Рады Партыі БНФ Аляксей Кавалец, быў затрыманы супрацоўнікамі міліцыі. Па словах міліцыянтаў, яны нібы атрымалі ананімную інфармацыю, што ў аўтамабілі перавозяць алкаголь і наркотыкі. Аб гэтым прэс-цэнтру Хартыі’97 паведаміў прэс-сакратар лідэра апазіцыі Павал Мажэйка.

Палітыкаў адвезлі ў Белаазёрскі РУУС, дзе быў дагледжаны аўтамабіль. У машыне нічога знойдзена не было. Аляксандр Мілінкевіч і Аляксей Кавалец вымушаныя былі напісаць тлумачальныя, што яны знаходзіліся ў Белаазёрску, паколькі праводзілі збор подпісаў сярод насельніцтва за вылучэнне грамадзянаў кандыдатамі ў дэпутаты.

Па словах Паўла Мажэйкі, у самы блізкі час затрыманых павінны вызваліць.

“Гэта чарговы факт ціску на Мілінкевіча і яго каманду. Мілінкевіча затрымоўваюць нязменна падчас яго паездак па краіне. У мінулы раз, у Віцебску, заяўлялі, што ён падобны на ўдзельніка аварыі, які нібы задавіў пешахода. Фантазіі міліцыянтаў няма мяжы”, – гаворыць Павал Мажэйка.