У Беларусь едуць «Правда», «Красная звезда», «Союзное вече», «Щит и меч» :: Хартыя'97 :: Навiны

Пытанням рэалізацыі міграцыйнай палітыкі ў так званай “саюзнай дзяржаве” прысвечаны прэс-тур расейскіх журналістаў у Беларусь, які адбудзецца з 5 па 7 снежня. Паездка арганізаваная Нацыянальным прэс-цэнтрам Беларусі, Пастаянным камітэтам “саюзнай дзяржавы” і амбасадай Беларусі ў Расеі.

У складзе групы прадстаўнікоў расейскіх СМІ будзе каля 40 чалавек, паведаміў карэспандэнту БЕЛТА прэс-сакратар амбасады Аляксандр Гардзейчык. Сярод іх – карэспандэнты тэлеканалаў “РБК-ТВ”, “Russia Today”, “Московия”, Тэлерадыёвяшчальнай арганізацыі “саюзнай дзяржавы”, радыёстанцый “Радио России” і “Голос России”, інфармацыйных агенцтваў ІТАР-ТАСС, РІА “Новости”, "Союз-инфо", газет “Трибуна”, “Правда”, “Красная звезда”, “Союзное вече”, “Щит и меч”, “Парламентской газеты”, часопісаў “Союзное государство”, “Пограничник”, “Таможня”, “Российская миграция” і шэрагу іншых выданняў.

Падчас прэса-тура яго ўдзельнікі сустрэнуцца з кіраўніцтвам Дзяржаўнага мытнага камітэта і Дзяржаўнага камітэта памежных войскаў Беларусі, азнаёмяцца з працай Адзінай аўтаматызаванай інфармацыйнай сістэмы Мытнага камітэта “саюзнай дзяржавы”, наведаюць памежны пераход “Каменны Лог”, памежную заставу “Лоша”, аб’екты Смаргонскага памежнага атрада. У рамках прэс-тура адбудзецца таксама паседжанне круглага стала на тэму: “Міграцыйная палітыка Рэспублікі Беларусь і Расейскай Федэрацыі ў рамках “саюзнай дзяржавы”.