Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Прадстаўнікі ўсіх канфесій Беларусі маюць намер супрацьстаяць фашызму 13:26, 04/12/2006
Саюз беларускіх габрэйскіх грамадскіх аб’яднанняў і суполак ініцыяваў стварэнне ў Беларусі міжрэлігійнага камітэта па процідзеянні праявам неафашызму, паведамілі “Інтэрфаксу” у панядзелак у Саюзе. Падставай для абмеркавання пытання аб стварэнні камітэта сталі факты апаганення культавых будынкаў і помнікаў нацысцкай сымболікай.
Ініцыятыву падтрымалі святар Расейскай праваслаўнай царквы Фёдар Поўны, настаяцель касцёла Святога Сымона і Святой Алены (Чырвоны касцёл) Уладзіслаў Завальнюк, муфтый Мусульманскага рэлігійнага аб’яднання ў Беларусі Абу-Бекір Шабановіч, а таксама прадстаўнікі дыпмісій Ізраіля ў Беларусі.
Як раней паведамляў “Інтэрфакс”, 12 лістапада на цэнтральным помніку мемарыяльнага комплексу “Яма” у Менску была намаляваная фашысцкая свастыка, аблітыя белай фарбай скульптуры, напісаныя некалькі слоў, меркавана на іўрыце, тут жа была пакінутая ўлётка з подпісам “Фронт арыйскага супраціву “Белая Русь”.
Па факце апаганення помніка ўзбуджаная крымінальная справа па арт.341 (апаганенне будынкаў і псаванне маёмасці) КК Беларусі. Расследаваннем крымінальнай справы займаецца аддзел дазнання Цэнтральнага РУУС Менска.
