Ірыне Казулінай дазволілі спатканне з мужам :: Хартыя'97 :: Навiны

5 снежня Ірына Казуліна сустрэнецца са сваім мужам Аляксандрам Казуліным у калоніі “Віцьба-3” пад Віцебскам.

Жонка палітвязня, які ўжо 46-ы дзень трымае галадоўку, паведаміла, што дазвол на кароткатэрміновую сустрэчу яна атрымала пасля сённяшняй сустрэчы з намеснікам начальніка Дэпартамента выканання пакаранняў (ДВП) МУС Беларусі Юрыем Барынковым. “Гэтая сустрэча была недоўгачасовай. Але для мяне яна мае пазітыўны вынік. Заўтра, я спадзяюся, убачуся з мужам”, – сказала І.Казуліна. Яна распавяла таксама, што прасіла намесніка ДВП МУС дазволіць прысутнічаць на сустрэчы Сяргею Скрабцу, які выйшаў на волю ў сярэдзіне лістапада. Ён таксама адбываў пакаранне ў калоніі “Віцьба-3” і галадаў у знак салідарнасці з А.Казуліным. Аднак С.Скрабца на спатканне з экс-кандыдатам у прэзідэнты не пусцілі.

Па словах І.Казулінай, у калонію “Віцьба-3” яна адправіцца раніцай 5 снежня. Нагадаем, за восем месяцаў зняволення і за час галадоўкі А.Казулін схуднеў на 40 кілаграмаў. Сёння раніцай ціск зняволенага склаў 75 на 60 мм рт. сл.

Экс-кандыдат у прэзідэнты абвясціў галадоўку 20 кастрычніка, пратэстуючы такім чынам супраць “існуючага ў краіне беззаконня”, а таксама каб прыцягнуць увагу Рады Бяспекі ААН да сітуацыі ў Беларусі.