Камуністы адмаўляюцца ад удзелу ў выбарах :: Хартыя'97 :: Навiны

Сёньня ў Беларусі завяршаецца чарговы этап выбарчай кампаніі па выбарах дэпутатаў мясцовых саветаў. Кандыдаты ў дэпутаты, якія вылучаліся шляхам збору подпісаў, а таксама працоўнымі калектывамі ці палітычнымі партыямі мусяць здаць ў выбарчыя камісіі на праверку неабходныя дакумэнту. Напярэдадні ў Менску адбыўся нечарговы зьезд Партыі камуністаў Беларускай (ПКБ). Форум з удзелам амаль 250 дэлегатаў рэкамэндаваў усім прэтэндэнтам ПКБ у кандыдаты дэпутатаў мясцовых саветаў зьняць свае кандыдатуры.

“З улікам таго, што Лукашэнка заявіў: “выбары прэзыдэнцкія былі фальшаваныя” і з улікам, што нашы прадстаўнікі не ўключаны ў выбарчыя камісіі, зьезд рэкамэндаваў ня ўдзельнічаць у мясцовых выбарах. Кандыдаты пойдуць здаваць подпісы, сабраныя ініцыятыўнымі групамі, але ўдзельнічаць у выбарах не будзем”, -- патлумачыў “Радыё Свабода” рашэньне форуму сябра бюро ЦК ПКБ Сяргей Вазьняк.

“Па-першае, Лукашэнка нядаўна заявіў аб фальсыфікацыі выбараў, — сказаў лідэр партыі Сяргей Калякін, — па-другое, практыка нашага ўдзелу ў гэтых выбарах паказала: ні аднаго чалавека з апазыцыйных партыяў не ўключылі ў выбарчыя камісіі. Улада паводзіць сябе як заўсёды. Гэта фарс і мы ня можам дазволіць сабе браць удзел у падмане нашых выбаршчыкаў”.

Калякін запэўніў, што падтрымка ў ПКБ ёсьць — за партыйных кандыдатаў сабралі больш за 70 тысяч подпісаў.

“Аднак браць удзел у гэтым фарсе ПКБ сваім кандыдатам не рэкамэндуе”, — дадаў Калякін.

Са словаў Сяргея Вазьняка, у ПКБ было амаль 150 патэнцыйных кандыдатаў. А найбольшую колькасьць кандыдатаў у дэпутаты вылучае Аб’яднаная грамадзянская партыя – да 200 чалавек . Партыя БНФ вылучыла 132 кандыдаты.

У сувязі з заканадаўчымі зьменамі, падпісныя лісты неабходна здаваць адначасова з іншымі дакумэнтамі, у прыватнасьці, з дэклярацыяй аб прыбытках. Сама працэдура рэгістрацыі кандыдатаў у дэпутаты адбудзецца з 5 па 14 сьнежня.