Польшча папрасіла Літву выдаць беларускага шпіёна :: Хартыя'97 :: Навiны

У панядзелак Генпракуратура Літвы атрымала просьбу праваахоўных органаў Польшчы аб выдачы падазраванага ў шпіёнскай дзейнасці грамадзяніна Беларусі Сяргея Моніча. Як паведамілі ў Генпракуратуры, у дадзены момант прашэнне аб экстрадыцыі перакладаецца на літоўскую мову.

Моніч, які падазраецца ў шпіёнскай дзейнасці супраць Польшчы, а магчыма і супраць Літвы, быў затрыманы 25 лістапада ў Вільні, па просьбе польскіх пракурораў. Выяўленне і затрыманне грамадзяніна Беларусі, які шукаецца ў Польшчы, Генпракуратура Літвы даручыла Дэпартаменту дзяржбяспекі (ДДБ).

Суд санкыянаваў затрыманне беларускага грамадзяніна на месяц. Ён даў сведчанні і знаходзіцца ў Віленскай турме – СІЗО Лукішкес. Паводле дадзеных польскіх пракурораў, Моніч збіраў інфармацыю аб структуры польскіх спецслужбаў, цікавіўся кантактамі супрацоўнікаў і сакрэтнымі дакументамі.

Беларускі грамадзянін, па словах пракурораў, быў вельмі добра навучаны і асабліва асцярожны. Месца і час сустрэчы з верагоднымі агентамі ён узгадняў на працягу некалькіх месяцаў, а напярэдадні самой сустрэчы мяняў яе месца, вербаванне адбывалася не адзін год за межамі Польшчы. Шпіён прыязджаў у замежную дзяржаву пад выглядам турыста, які мае намер купіць тавары для рамонту жылля. Спачатку ён завязваў знаёмствы, потым вербаваў, інструктаваў, а за прадстаўленую інфармацыю плаціў грошы.

ДДБ не выключае, што падазраваны ў шпіянажы супраць Польшчы грамадзянін Беларусі мог дзейнічаць і супраць Літвы. Беларускі Камітэт дзяржаўнай бяспекі назваў паведамленні аб затрыманні беларускага шпіёна “правакацыяй”, паведамляе BNS.