Еўразвяз будзе паляпшаць палітыку добрасуседства :: Хартыя'97 :: Навiны

Еўрапейская камісія апублікавала прапановы, накіраваныя на паляпшэнне і ўмацаванне еўрапейскай палітыкі суседства, у рамках якой развіваюцца і двухбаковыя адносіны ЕЗ з краінамі былога СССР.

Адпаведнае камюніке было апублікаванае ў панядзелак у Брусэлі еўрапейскім камісарам па пытаннях знешніх адносінаў і палітыкі суседства Бенітай Ферэра-Вальднер.

Як адзначаецца ў паведамленні Еўракамісіі, першыя 18 месяцаў ужывання еўрапейскай палітыкі суседства прынеслі добрыя вынікі. У Еўракамісіі адзначаюць, што новыя прапановы накіраваныя на паляпшэнне ўкаранення гэтай палітыкі пасродкам ініцыятывы з боку Еўразвяза ў плане аказання дапамогі партнёрам, якія жадаюць працягнуць рэфармаванне “хутчэй і лепш”. “Новыя прапановы суправаджаюць справаздачы па імплементацыі еўрапейскай палітыкі суседства. Камюніке будзе прынятае ў працу падчас нямецкага прэзідэнцтва ў першай палове 2007 года”, – адзначаюць у Еўракамісіі.

Еўракамісар Беніта Ферэра-Вальднер таксама паведаміла, што важным укладаннем у дадзеныя прапановы будзе стварэнне новага інвестыцыйнага фонду ў рамках еўрапейскай палітыкі суседства. “Палітыка суседства мела станоўчы пачатак, але Еўрапейскі Звяз можа зрабіць значна больш”, – падкрэсліла яна.

Па паведамленні Еўракамісіі, бюджэт еўрапейскай палітыкі суседства для краін-партнёраў на перыяд з 2007 па 2013 гады складзе 12 мільярдаў еўра. У прыватнасці, як адзначаецца ў суправаджальных дакументах, рост фінансавання складзе 20%, перадае “Інтэрфакс”.

Сярод прапаноў, распрацаваных Еўракамісіяй, названыя “пэўныя перспектывы для ўсіх партнёраў па еўрапейскай палітыцы суседства, як усходніх, так і паўднёвых”, у дачыненні паглыблення эканамічнай і гандлёвай інтэграцыі з ЕЗ, накіраваныя на стварэнне зоны свабоднага гандлю, “значнае паляпшэнне візавых працэдур для вызначаных тыпаў людзей”, а таксама “рэгулярныя сустрэчы на ўзроўні міністраў і экспертаў з партнёрамі еўрапейскай палітыкі суседства” з мэтай абмеркавання пытанняў энергетыкі, транспарта, навакольнага асяроддзя і сферы аховы здароўя. Таксама мяркуецца ўмацоўваць палітычнае супрацоўніцтва, падвысіць ролю ЕЗ у канфліктных рэгіёнах.

Усяго ў рамках еўрапейскай палітыкі суседства ЕЗ супрацоўнічае з 16 краінамі: Алжыр, Арменія, Азербайджан, Беларусь, Егіпет, Грузія, Ізраіль, Іардан, Ліван, Лівія, Малдова, Марока, Палестына, Сірыя, Туніс і Украіна.

Удзел Беларусі ў праграмах палітыкі добрасуседства абмежаваны дзейнасцю па развіцці грамадзянскай супольнасці, развіццём малога і сярэдняга бізнэсу, уладкаваннем меж і сумеснымі дзеяннямі па ўмацаванні меж і ў вобласці правасуддзя і ўнутраных спраў. Поўнамаштабны ўдзел нашай краіны ў праектах палітыкі добрасуседства магчымы пасля выканання нядаўна агучаных Еўракамісіяй 12 умоваў: вызваліць усіх палітычных зняволеных, расследаваць справы выкрадзеных палітыкаў і журналіста, правесці свабодныя і справядлівыя выбары, перастаць умешвацца ў працу судоў, даць беларусам магчымасць атрымоўваць незалежную інфармацыю, не ўмешвацца ў прыватны бізнэс, паважаць правы грамадскіх арганізацый і незалежных прафсаюзаў, захоўваць правы нацыянальных меншасцяў.