ЦВК падвядзе вынікі вылучэння кандыдатаў у дэпутаты :: Хартыя'97 :: Навiны

У Цэнтральную камісію Рэспублікі Беларусь па выбарах і правядзенню рэспубліканскіх рэферэндумаў паступаюць дадзеныя аб вылучэнні кандыдатаў у дэпутаты мясцовых Саветаў. Як паведаміў карэспандэнту БЕЛТА сакратар ЦВК Мікалай Лазавік, у прыватнасці ў горадзе Менску, дзе створана 55 выбарчых акруг, дакументы на рэгістрацыю ў якасці кандыдатаў у дэпутаты гарадскога Савета дэпутатаў падалі 237 чалавек.

З іх 33 былі высунутыя палітычнымі партыямі. У прыватнасці, Камуністычнай партыяй Беларусі высунуты 21 кандыдат, Ліберальна-дэмакратычнай партыяй – 6, Аб`яднанай грамадзянскай партыяй – 2, Рэспубліканскай партыяй працы і справядлівасці – 4. Працоўнымі калектывамі сталічных прадпрыемстваў высунуты 51 кандыдат. Больш за 60 грамадзянаў, якія падалі дакументы ў выбарчыя камісіі на рэгістрацыю іх кандыдатамі ў дэпутаты, адначасова высоўваюцца некалькімі спосабамі – і шляхам збору подпісаў, і ад працоўных калектываў і ад палітычных партый. На мандат дэпутата прэтэндуюць 48 жанчын. Каля 10% ад агульнай колькасці грамадзянаў, якія падалі дакументы, – дзеючыя дэпутаты.

Мікалай Лазавік лічыць, што ў сталіцы будзе зарэгістраваная самая вялікая колькасць кандыдатаў на мандат дэпутата гарадскога Савета ў параўнанні з іншымі рэгіёнамі краіны.

Праверка правільнасці працэдуры вылучэння кандыдатаў і прадстаўленых імі звестак будзе весціся выбарчымі камісіямі да 14 снежня ўключна, сказаў сакратар. Разам з тым ён адзначыў, што выбаркамы могуць у любы дзень з 5 па 14 снежня прыняць рашэнне аб рэгістрацыі кандыдатам у дэпутаты. Агітацыйную кампанію кандыдат можа пачынаць з моманту атрымання пасведчання аб ягонай рэгістрацыі.

Канчатковыя дадзеныя аб колькасці грамадзянаў, якія падалі дакументы на іх рэгістрацыю кандыдатамі ў дэпутаты мясцовых Саветаў, ЦВК плануе падвесці ў самы блізкі час.