КГБ забраў пашпарт ў старшыні Саюза палякаў Беларусі :: Хартыя'97 :: Навiны

Сёння падчас допыту супрацоўнікі ўпраўлення КГБ па Гарадзенскай вобласці адабралі пашпарт у Анжалікі Борыс, кіраўнічкі Саюза палякаў у Беларусі. Анжаліка Борыс уваходзіць у склад дэлегацыі, якая 11 снежня, разам з Аляксандрам Мілінкевічам, вылеціць у Страсбур, дзе лідэр аб`яднаных дэакратычных сіл мае атрымаць узнагароду Еўрапейскага парламента імя Андрэя Сахарава.

Аляксандр Мілінкевіч перакананы, што гісторыя з пашпартам Анжалікі Борыс не ёсць выпадковай, і звязана менавіта з візітам у Страсбург.

- Сваімі дзеяннямі КГБ фактычна забараніла Анжаліцы Борыс удзельнічаць у сустрэчах самага высокага ўзроўню, якія запланаваныя для беларускай дэлегацыі ў Страсбургу. Сёння Анжаліка Борыс з`яўляецца адным з сімвалам змагання з беспраўем у Беларусі і прыкладам адстойвання сваіх правоў. Безумоўна, забарона на выезд - гэта працяг той кампаніі, якую вядзе ўлада, каб максімальна аслабіць нашую дэлегацыю і перашкодзіць нам выступіць на сесіі Еўрапарламента, - сказаў Аляксандр Мілінкевіч.

Анжаліка Борыс была выкліканая ў КГБ у якасці сведкі па крымінальнай справе. 29 кастрычніка аўтамабіль, у якім ехала А.Борыс з калегамі, быў затрыманы на памежным пераходзе Прывалка, што на поўначы Гарадзенскага раёну на мяжы з Літвой. Падчас агляду машыны, мытнікі “выпадкова” раскруцілі люстэрка, у якім знайшлі парашок, які аказаўся наркотыкам. Галоўная рада Саюзу палякаў назвала гэтае здарэнне правакацыяй.