У 2007 годзе Лукашэнка наведае Арабскія Эміраты, Аман і Саўдаўскую Аравію :: Хартыя'97 :: Навiны

Аляксандр Лукашэнка ў 2007 годзе, як чакаецца, наведае шэраг краінаў Паўднёваўсходняй Азіі, Індыю, ААЭ, Аман, Саўдаўскую Аравію. Беларускае знешнепалітычнае ведамства ў цяперашні час узгадняе тэрміны візітаў. Аб гэтым у інтэрв`ю карэспандэнту БЕЛТА паведаміў намеснік міністра замежных спраў Віктар Гайсёнак.

Па ягоных словах, Беларусь у наступным годзе мае намер узмацніць сваю прысутнасць у афра-азіяцкім рэгіёне, у тым ліку дзякуючы кантактам з краінамі-сябрамі Руху недалучэння. “У нас ужо атрымалася дамагчыся ўстойлівага развіцця гандлёва-эканамічных адносінаў з краінамі Азіі і Афрыке, якія ўдзельнічаюць у РН. Па выніках 2005 года таваразварот Беларусі з імі склаў больш за $1,7 млрд., павялічыўшыся на 43% у параўнанні з 2004 годам. Беларускі экспарт у краіны Азіі і Афрыкі па выніках 2005 года ўпершыню перавысіў мільярдны ўзровень і ўзрос амаль на 40%. Большасць дзяржаў афра-азіяцкага рэгіёна імпартуюць прадукцыю беларускіх машынабудаўнічых, нафтахімічных, электронных і іншых галін нашай прамысловасці”, – падкрэсліў Віктар Гайсёнак.

Як адзначыў намеснік міністра замежных спраў, экспарт беларускіх тавараў у Егіпет за студзень-верасень 2006 года дасягнуў 885 адзінак. Адным з самых буйных імпарцёраў грузавых аўтамабіляў “МАЗ” у далёкім замежжы з`яўляецца Сірыя, куды за дзевяць месяцаў гэтага года пастаўлена звыш за 600 машын. У Егіпце, В`етнаме, Эфіёпіі і Іране рэалізуюцца сумесныя праекты па арганізацыі зборкі аўтатрактарнай тэхнікі беларускага ўзору, а ў Беларусі ў 2006 годзе стартаваў сумесны з Іранам праект па выпуску легкавых аўтамабіляў.

Віктар Гайсёнак падкрэсліў, што адносіны з дзяржавамі-сябрамі РН афра-азіяцкага рэгіёна “ужо зараз маюць высокую дынаміку як у частцы візітаў на вышэйшым і высокім узроўнях, так і ў плане ўзаемнай падтрымкі ў міжнародных арганізацыях”. Ён нагадаў, што за апошні час Лукашэнка наведаў Егіпет, шэраг краінаў Заліва (ААЭ, Кувейт, Катар і Бахрэйн), Лівію, Ліван, Іран, двойчы ажыццявіў візіты ў Сірыю. У 2005-2006 гадах у рамках міжнародных арганізацый адбыліся сустрэчы Аляксандра Лукашэнкі з кіраўніцтвам Ірака, ПАР, Ірана, Алжыра, Малайзіі.