Польская газэта «Dziennik»: «Крэмль стомлены ад Лукашэнкі» :: Хартыя'97 :: Навiны

Адна з найбольш масавых польскіх штодзённых газэтаў “Dziennik” напісала сёньня пра сустрэчу ў часе саміту НАТО ў Рызе, якая, паводле газэты, сьведчыць аб тым, што Крэмль “мае сур’ёзны намер пазбавіцца ад Лукашэнкі”. “Крэмль настолькі стомлены ад Лукашэнкі, што размаўляе з дэмакратычнай апазыцыяй. Як нам стала вядома, у часе саміту НАТО ў Рызе дарадца Уладзіміра Пуціна Сяргей Караганаў сустракаўся з лідэрам беларускай апазыцыі Аляксандрам Мілінкевічам, прычым у сустрэчы браў удзел былы дарадца амэрыканскай адміністрацыі Збігнеў Бжэзіньскі”,-- цытуе «Радыё Свабода» газэту “Dziennik”.

Паводле газэты, “шмат што сьведчыць пра пачатак сур’ёзных амэрыканска-расейска-беларускіх перамоваў аб тым, як пазбыцца дыктатара”.

“Dziennik” падае меркаваньні крыніцаў, набліжаных да Крамля, якія сьцьвярджаюць, што там думаюць пра наступніка Лукашэнкі.

“Амэрыканцы ўжо даўно хочуць пазбавіцца ад Лукашэнкі, а апошнім часам да ЗША далучылася Расея. Лукашэнка блякуе ўваход у Беларусь расейскага бізнэсу, сам, аднак, карыстаецца з прывілеяў у гандлі з Расеяй. Ён перакананы, што Крэмль нічога ня зробіць, каб яго скінуць, бо кожны ягоны пераемнік павернецца да Захаду. Але гэта памылка”, - піша польскі штодзёньнік.

“Лукашэнка ўжо не задавальняе Маскву на пасадзе кіраўніка Беларусі. З гэтага пату трэба нейк выйсьці. Без супрацоўніцтва з апазыцыяй і Вашынгтонам, гэта будзе цяжка зрабіць”, - падсумоўвае “Dziennik” у артыкуле “Крэмль хоча пераменаў у Менску”.