Мінгандль ЗША захавае абмежаванні на ўвоз прадукцыі з Беларусі :: Хартыя'97 :: Навiны

Міністэрства гандлю ЗША лічыць неабходным захаваць антыдэмпінгавыя абмежаванні на ўвоз аміячнай салетры (нітрату амонія) з Украіны, а таксама некаторых сталёвых вырабаў з Беларусі, Казахстана, Малдовы, Украіны і шэрагу іншых краінаў.

Пераглядаючы гэтыя абмежаванні па заканчэнні вызначанага законам тэрміна Мінгандль ЗША прыйшоў да высновы, што іх адмена “хутчэй за ўсё, прывяла б да працягу або аднаўлення дэмпінгу”. Паводле апавяшчэнняў, якія былі апублікаваныя ва ўрадавым весніку Federal Register, высновы носяць канчатковы характар.

Як адзначае ІТАР-ТАСС, апроч сутнасці прынятага рашэння, для экспарцёраў у ім найбольш важныя памеры антыдэмпінгавай маржы. Для ўсіх украінскіх пастаўшчыкоў аміячнай салетры Мінгандль ЗША прапаноўвае ўсталяваць гэты бар’ер на ўзроўні 156,29%.

Па гарачакачанай сталі для казахстанскіх прадпрыемстваў прапаноўваецца маржа ў памеры 243,46 %, а для ўкраінскіх – 90,33 %.

Расследваннем таксама былі ахопленыя экспарцёры з Аргентыны, Індыі, Інданэзіі, Кітая і Тайваня, Румыніі, Тайланда і ПАР. Для іх вызначаныя маржы ў межах ад 4,44 % (па Тайланду, за выключэннем аднаго прадпрыемства) да 90,83 % (па Кітаю, за выключэннем шэрагу прадпрыемстваў з больш нізкімі стаўкамі).

Па сталёвым арматурным пруце для Малдовы рэкамендаваная маржа ў 232,86 %, а для Беларусі – у 114,53 %. Для пастаўшчыкоў з Інданэзіі, Кітая, Паўднёвай Карэі і Польшчы ўсталёўваюцца бар`еры на ўзроўні ад 23 % да 133 %.