50 дзён галадоўкі Аляксандра Казуліна. Лідэры апазыцыі зьвярнуліся да прэм’ер-міністра :: Хартыя'97 :: Навiны

Лідэры аб’яднанай апазыцыі зьвярнуліся з адкрытым лістом да прам’ер-міністра Беларусі Сяргея Сідорскага. Такім чынам палітыкі выканалі патрабаваньне экс-кандыдата на прэзідэнта Беларусі, палітвязня Аляксандра Казуліна, які галадае ў віцебскай выпраўленчай калоніі вось ужо 50 дзён. Лідэры апазыцыі пішуць, што Аляксандр Казулін, які праводзіць палітычную галадоўку ў калёніі, яшчэ 20 верасьня заклікаў Сяргея Сідорскага згодна з Канстытуцыяй ўзяць на сябе паўнамоцтвы кіраўніка дзяржавы і прызначыць новыя прэзыдэнцкія выбары, паколькі Аляксандр Лукашэнка займае пасаду прэзыдэнта незаконна. Аднак Сяргей Сідорскі дагэтуль не адказаў на заклік Аляксандра Казуліна.

“Сёньня 50 дзён палітычнай галадоўкі Аляксандра Казуліна. Жыцьцё палітыка пад пагрозай. Поўная адказнасьць за жыцьцё і здароўе экс-кандыдата на прэзыдэнта Аляксандра Казуліна ўскладаецца на беларускія ўлады”, -- пішуць аўтары ліста да Сяргея Сідорскага і заклікаюць прам’ера тэрмінова адказаць Аляксандру Казуліну.

Ліст падпісалі лідэр беларускай апазыцыі Аляксандр Мілінкевіч і кіраўнікі дэмакратычных партый Анатоль Лябедзька, Анатоль Ляўковіч, Вінцук Вячорка, Сяргей Калякін, Аляксей Кароль, Аляксандр Бухвостаў.

ЗВАРОТ Аб`яднаных дэмакратычных сіл да прэм’ер–міністра Рэспублікі Беларусь Сяргея Сідорскага

20 кастрычніка 2006 года былы кандыдат у прэзідэнты Рэспублікі Беларусь Аляксандр Казулін, асуджаны на пяць з паловай гадоў за свае палітычныя перакананні, пачаў бестэрміновую галадоўку пратэсту.

У звязку з тым, што прэзідэнцкія выбары 2006 года ў Беларусі не былі прызнаныя міжнароднай супольнасцю, Аляксандр Казулін 20 верасня звярнуўся да Вас, спадар Сідорскі, як да прэм’ер-міністра Беларусі з патрабаваннем, адпаведна Канстытуцыі Рэспублікі Беларусь, узяць на сябе часовае выкананне абавязкаў кіраўніка дзяржавы і прызначыць паўторныя выбары прэзідэнта Беларусі. З такім жа зваротам да Вас звяртаўся былы старшыня Савета Рэспублікі, акадэмік Вайтовіч.

Мужнасць і рашучасць Аляксандра Казуліна ў барацьбе за свае правы сёння з`яўляецца сімвалам імкнення ўсіх беларусаў жыць у вольнай дэмакратычнай краіне. Беларускі народ мае законнае права на палітычныя свабоды.

Сёння мінае 50-ы дзень палітычнай галадоўкі Аляксандра Казуліна. Жыццё палітыка – пад пагрозай. Поўная адказнасць за жыццё и здароўе экс-кандыдата ў прэзідэнты Аляксандра Казуліна ляжыць на беларускіх ўладах.

Таму мы патрабуем ад Вас неадкладна разгледзець зварот Аляксандра Казуліна і даць на яго адказ.

Ад Аб’яднаных дэмакратычных сіл:

Аляксандар Мілінкевіч, лідэр дэмакратычных сіл

Анатоль Лябедзька, старшыня Аб’яднанай грамадзянскай партыі

Анатоль Ляўковіч, выканаўца абавязкаў старшыні Беларускай сацыял-дэмакратычнай партыі (Грамады)

Аляксей Кароль, наместнік старшыні Беларускай сацыял-дэмакратычнай партыі (Грамады)