У акцыі салідарнасці з Аляксандрам Казуліным возьме ўдзел 500 чалавек :: Хартыя'97 :: Навiны

8 снежня, на 50-ы дзень палітычнай галадоўкі экс-кандыдата ў прэзідэнты, палітвязня Аляксандра Казуліна ягоныя паплечнікі пачынаюць масавую галадоўку салідарнасці. Як паведамляе прэс-служба экс-кандыдата ў прэзідэнты, у акцыі возьмуць удзел сябры менскай арганізацыі Беларускай сацыял-дэмакратычнай партыі (Грамада), сябры палітычных партый з усіх абласцей Беларусі і менскі штаб аб’яднаных дэмакратычных сіл. У галадоўцы будуць удзельнічаць вядомыя палітыкі Віктар Івашкевіч, Алена Скрыган, Валянціна Палевікова, прафсаюзны лідэр Генадзь Фядыніч, старшыня Саюза беларускіх пісьменнікаў Алесь Пашкевіч, дочкі Аляксандра Казуліна Вольга і Юлія. Актывістка АГП Крысціна Шацікава заявіла, што будзе галадаць 7 дзён.

Масавая галадоўка працягнецца адзін дзень. “Гэта сымбалічная галадоўка. А.Казулін не павінен памерці. Сёння нам дарагі кожны дзень, кожная гадзіна. Мы не можам дазволіць Аляксандру Ўладзіслававічу працягваць галадоўку. Сёння ён знаходзіцца ў вельмі цяжкім стане, і кожны наступны дзень галадоўкі можа зрабіць непапраўнае. Мы падтрымліваем усе ягоныя патрабаванні і настойліва просім яго спыніць галадоўку. Ён сваёй галадоўкай зрабіў значна больш, чым мы маглі і меркаваць. Таму няхай перадае сваю эстафету нам. Мы яе падхопім”, – кажа арганізатар акцыі Алесь Стральцоў.

Па інфармацыі прэс-службы А.Казуліна, галадоўкі салідарнасці ўжо некалькі дзён праходзяць у Наваполацку. З 3-га снежня там галадае актывіст апазіцыі Андрэй Раеўскі. Ён збіраецца галадаць 8 дзён. Сёння да яго далучацца іншыя актывісты.