Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Як паведаміла прэс-цэнтру Хартыі’97 крыніца ва ўрадзе Беларусі, у цэлым дасягнута дамоўленасць паміж расейскім і беларускім бакамі па кошце “Белтрансгаза” і цане расейскага газу, які пастаўляецца ў Беларусь. Па згодзе бакоў, кошт “Белтрансгаза” ацэнены ў 7 мільярдаў даляраў, і Расея фактычна атрымоўвае кантрольны пакет акцый сумеснага прадпрыемства. Сума ў 3,5 мільярды даляраў, якія Расея павінна была бы выплаціць беларускаму боку, будзе ўлічвацца падчас фармавання цаны газу, які пастаўляецца ў Беларусь. Дасягнута дамоўленасць, што Беларусь будзе ў 2007-2008 гг плаціць 90 даляраў за тысячу кубаметраў газу.
На практыцы гэта азначае, што рэальная цана газу для Беларусі будзе перавышаць 200 даляраў за тысячу кубаметраў, а Расея бясплатна атрымоўвае кантроль над “Белтрансгазам”, не выплачваючы яго кошт Беларусі, а пастаўляючы газ па сусветнай цане. Іншымі словамі, больш за 110 даляраў за кожную тысячу кубаметраў будзе ісці ў аплату расейскай долі сумеснага прадпрыемства “Газпрома” і “Белтрансгаза”.
Для параўнання: Украіна дамовілася аб пастаўках расейска-сярэднеазіяцкага газу па 135 даляраў за тысячу кубаметраў, захаваўшы ў сваёй уласнасці газатранспартную інфраструктуру. Прычым Украіна сама здабывае 30% газу ад агульнага неабходнага аб`ёму, і гэта цалкам задавальняе запатрабаванні насельніцтва. Да таго ж Украіна мае значна большы прыбытак ад транзіту газу праз сваю тэрыторыю, бо аб`ём газу, які прапампоўваецца праз тэрыторыю Ўкраіны, у некалькі разоў больш за беларускі транзіт.
