Натан Шчаранскі ў другі раз ганараваны вышэйшай узнагародай ЗША – медалем Свабоды :: Хартыя'97 :: Навiны

Амерыканскі прэзідэнт Джордж Буш узнагародзіў былога савецкага дысідэнта, а зараз вядомага ізраільскага палітыка Натана Шчаранскага вышэйшай узнагародай ЗША – прэзідэнцкім медалем Свабоды. “Натан Шчаранскі быў адпраўлены Савецкім рэжымам у ГУЛАГ за ягоную працу па прасоўванні рэлігійнай свабоды і правоў чалавека”, адзначаецца ў паведамленіі прэс-службы Белага дома. У ім адзначаецца, што прэзідэнцкім медалем свабоды па рашэнні кіраўніка дзяржавы ўзнагароджваюцца асобы, “якія ўнеслі вельмі каштоўнае ўкладанне ў бяспеку або нацыянальныя інтарэсы ЗША, мір ва ўсім свеце, а таксама культурныя або іншыя значныя дасягненні”.

“Ён (Шчаранскі) застаецца паслядоўным у сваім не прыманні тыраніі і працягвае выступаць за прынцыпы, паводле якіх усе людзі заслугоўваюць жыць у свабодзе і прасоўванне свабоды з`яўляецца крытычна важным для міру і бяспекі па ўсім свеце”, –паведамляе прэс-служба прэзідэнта ЗША.

Буш урачыста ўручыць медаль Шчаранскаму на цырымоніі ў Белым доме 15 снежня, паведамляе РІА “Новости”.

Натан (Анатоль) Шчаранскі быў вядомым савецкім праваабаронцай і дысідэнтам. Яму было адмоўлена ў праве эміграваць у Ізраіль. Ён дзевяць год правёў у савецкіх лагерах і пакінуў СССР толькі пасля таго, як у 1986 годзе яго абмянялі на двух савецкіх разведчыкаў, арыштаваных на Захадзе.

Для Натана Шчаранскага гэта ўжо другі прэзідэнцкі медаль свабоды, якім яго дзейнасць адзначаюць у ЗША. Першым такім медалем яго ўзнагародзіў у 1989 годзе былы прэзідэнт ЗША Рональд Рэйган. У 1986 годзе Шчаранскаму быў уручаны залаты медаль кангрэса ЗША.