Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Праваабарончы цэнтр «Вясна» звярнуўся да Казуліна: «Дзеля будучых перамогаў спыніце галадоўку!» 11:16, 08/12/2006
Праваабарончы цэнтр "Вясна" заклікае экс-кандыдата ў прэзідэнты Беларусі, палітвязня Аляксандра Казуліна спыніць галадоўку, якая цягнецца ўжо 50 дзён. "Дзеля будучых перамогаў, дзеля набліжэння Беларусі да дэмакратыі і шанавання правоў чалавека мы просім вас не даць адбыцца трагедыі", -- гаворыцца ў заяве праваабаронцаў.
Прапануем тэкст заявы:
"Шаноўны Аляксандр Уладзіслававіч!
Праваабарончы цэнтр "Вясна" з вялікай трывогай сочыць за вашай галадоўкай і бязмерна занепакоены крытычным станам вашага здароўя і магчымымі наступствамі.
Мы падтрымліваем вашую барацьбу, накіраваную на вяртаньне Беларусі ў канстытуцыйнае прававое поле. Мы схіляемся перад вашай мужнасцю і самаахвярнасцю. Вы паказалі ўсім нам прыклад самааданасці і змагання за свабодную Беларусь. Але сёння вашае жыццё пад вялікай пагрозай. За гады дыктатуры беларускае грамадзтва страціла некаторых выбітных барацьбітоў за дэмакратыю ў краіне – вы таксама гэта добра ведаеце. Вы бачылі пакуты семьяў гэтых людзей і слёзы мацярок -- з гэтым не можа нішто параўнацца.
Аляксандр Уладзіслававіч! Мы заклікаем вас спыніць галадоўку. Не давайце нагоды для заспакаення і радасці служкам рэжыму. Не прынясіце гора і трагічнай страты вашым родным і аднадумцам – усім, хто вам верыць і спадзяецца на вашую плённую працу на карысць радзімы. Вашыя сілы, талент і веды запатрабаваныя ў нашай краіне.
Дзеля будучых перамогаў, дзеля набліжэння Беларусі да дэмакратыі і шанавання правоў чалавека мы просім вас не даць адбыцца трагедыі.
Са свайго боку мы завяраем вас, што робім усё магчымае, каб пра вашыя патрабаванні былі выкананыя, а таксама, каб усе палітычныя вязьні рэжыму былі вызваленыя.
