Ніжняя палата Кангрэса ЗША прыняла «Акт аб дэмакратыі ў Беларусі» :: Хартыя'97 :: Навiны

Палата прадстаўнікоў Кангрэса ЗША падоўжыла яшчэ на два гады тэрмін дзеяння “Акта аб дэмакратыі ў Беларусі”, які прадугледжвае эканамічныя санкцыі супраць урада Аляксандра Лукашэнкі за парушэнні ў вобласці дэмакратыі. Законапраект падтрымалі 397 кангрэсменаў і толькі двое галасавалі супраць.

“Акт аб дэмакратыі ў Беларусі”, які быў прыняты амерыканскім кангрэсам у кастрычніку 2004 года, патрабуе таксама, каб прэзідэнт ЗША падрабязна інфармаваў амерыканскі кангрэс аб усіх пастаўках “узбраенняў і звязаных з узбраеннем тэхналогій”, якія “Беларусь пастаўляе краінам-спонсарам міжнароднага тэрарызму”. Разам з гэтым кіраўнік Белага дома павінен назваць усе краіны, у якія Беларусь зрабіла такія пастаўкі, падаць “дэталёвае апісанне” перададзенай зброі і вайсковых тэхналогій, а таксама падаць звесткі аб “таварах, паслугах, крэдытах” і іншых формах аплаты. Якія атрымала Беларусь за гэтыя пастаўкі.

Асобным параграфам у законе запісана, што прэзідэнт ЗША павінен пры гэтым інфармаваць кангрэс “аб памеры асабістых актываў і маёмасці Аляксандра Лукашэнкі і іншых прадстаўнікоў вышэйшага кіраўніцтва ўрада Беларусі”.

Дакумент таксама прадугледжвае вылучэнне з федэральнага бюджэта ЗША $27,5 млн на падтрымку дэмакратычных працэсаў у Беларусі.

Закон прадугледжвае, што ўся гэтая інфармацыя падаецца ў кангрэс ЗША у адкрытым выглядзе, але можа суправаджацца засакрэчаным дадаткам.

У тэкст “Акта аб дэмакратыі ў Беларусі” уключана тлумачэнне, паводле якога да “вышэйшага беларускага кіраўніцтва аднесеныя прэзідэнт, прэм`ер-міністр, намеснікі прэм`ер-міністра, міністры ўрада, старшыні дзяржкамітэтаў, а таксама супрацоўнікі адміністрацыі прэзідэнта Беларусі”. Акрамя гэтага, да той жа катэгорыі аднесеныя “любыя афіцыйныя асобы ўрада Беларусі, хто асабіста і ў значнай ступені ўдзельнічае ў падаўленні свабодаў у Беларусі, уключаючы суддзяў і пракурораў”.

Законам прадугледжваецца таксама, што па рашэнні дзяржсакратара ЗША у гэты спіс можа быць уключаная любая іншая асоба, “якая ўдзельнічае ў выпрацоўцы і правядзенні палітыкі рэжыму Лукашэнкі, што знаходзіцца ў супярэчнасці з міжнародна прызнанымі стандартамі ў вобласці правоў чалавека”.