Генпракуратура Літвы просіць суд выдаць Польшчы беларускага шпіёна :: Хартыя'97 :: Навiны

Генеральная пракуратура Літвы звярнулася ў Віленскі акруговы суд з просьбай даць згоду на выдачу Польшчы затрыманага ў Вільні грамадзяніна Беларусі Сяргея Моніча, які падазраецца ў шпіёнскай дзейнасці. “Чакаецца, што суд пытанне аб экстрадыцыі С.Моніча разгледзіць на бягучым тыдні”, – паведамілі “Інтэрфаксу” у панядзелак у прэс-службе Генпракуратуры.

Просьба Польшчы аб экстрадыцыі затрыманага ў Генпракуратуру Літвы паступіла тыдзень таму.

Польскія праваахоўныя органы падазраюць затрыманага С.Моніча ў падбухторванні да шпіянажу, гэта значыць збіраць і перадаваць інфармацыю аб Польшчы, якая цікавіць разведку замежнай дзяржавы.

Дэпартамент дзяржбяспекі (ДДБ) Літвы таксама расследуе магчымыя дзеянні затрыманага грамадзяніна Беларусі не толькі супраць Польшчы, але і супраць Літвы.

Супрацоўнікі Генеральнай пракуратуры і ДДБ Літвы, выконваючы просьбу польскага боку знайсці і затрымаць грамадзяніна Беларусі, якога шукае праваахова Польшчы, 25 лістапада затрымалі С.Моніча.

“Генпракуратура Літвы і пракуратура Польшчы падкрэсліваюць, што затрыманне грамадзяніна Беларусі С.М. ніяк не звязанае са здзелкай польскай кампаніі PKN Orlen з акцыямі Mazeikiu nafta, з сітуацыяй на літоўска-латвійскай дзяржаўнай мяжы, якая абвастрылася, і з самітам НАТА у Рызе, што мае быць,” – паведаміла раней прэс-служба Генпракуратуры.

Паводле яе паведамлення, у выніку супрацоўніцтва спецслужбаў Літвы і Польшчы былі атрыманыя дадзеныя аб пазапраўных дзеяннях грамадзяніна Беларусі супраць Польшчы. На падставе гэтых дадзеных пракуроры Польшчы пачалі дасудовае расследаванне і перадалі Генеральнай пракуратуры Літвы просьбу аб прававой дапамозе, а менавіта папрасілі знайсці і затрымаць грамадзяніна Беларусі, выканаць некаторыя іншыя працэсуальныя дзеянні, што і было зроблена.

Суд у Вільні ў дачыненні затрыманага прыняў рашэнне ўжыць наступную меру – арышт тэрмінам на адзін месяц.

Пракурор з Польшчы Януш Качмарак (Janusz Kaczmarek) падчас брыфінгу ў Вільні паведамляў, што “С.Моніч некалькі гадоў на тэрыторыі Літвы і іншых дзяржаў сустракаўся з грамадзянамі Польшчы, спрабаваў іх вербаваць, здабываць сакрэтную інфармацыю, плаціў за яе”.