Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Сёння судзяць удзельнікаў акцыі ў Дзень правоў чалавека 09:38, 11/12/2006, фото ByMedia.net
Сёння ў судзе Цэнтральнага раёна Менска адбудуцца суды над затрыманымі 10 снежня, у Дзень правоў чалавека, актывістамі апазіцыі. Не менш за 30 чалавек былі затрыманыя ўчора напярэдадні і падчас акцыі салідарнасці з палітычнымі зняволенымі на Кастрычніцкай плошчы Менска. Большасць дэманстрантаў была вызваленая. У спецпрыёмніку-размеркавальніку на вуліцы Акрэсціна правялі ноч моладзевыя актывісты Алег Корбан, Зміцер Федарук, Уладзімір Сяргееў і Аляксандр Іўлеў.
Позву з`явіцца 12 снежня ў Цэнтральнае ўпраўленне ўнутраных спраў атрымаў таксама лідэр Аб`яднанай грамадзянскай партыі Анатоль Лябедзька, які быў затрыманы на плошчы.
У дачыненні ўсіх пяцёх апазіцыянераў складзеныя пратаколы па артыкуле 156 Кодэкса аб адміністрацыйных правапарушэннях – “дробнае хуліганцтва”. Затрыманым пагражае да 15 сутак арышту.
Удзельнікі акцыі патрабавалі вызваліць палітычных зняволеных, у тым ліку экс-кандыдата ў прэзідэнты Аляксандра Казуліна, які 53 дні галадае ў выпраўленчай калоніі “Віцьба-3”, патрабуючы разгляду сітуацыі ў Беларусі ў Радзе Бяспекі ААН. Людзі выйшлі на Кастрычніцкую плошчу Менска з партрэтамі палітвязняў і расцяжкай “Свабоду Казуліну!”
