Жыццё Казуліна ў небяспецы :: Хартыя'97 :: Навiны

У канцы тыдня, калі на расейскіх і беларускіх тэлеканалах былы савецкі народ масавымі дыскусіямі адзначаў 15-годдзе Белавежскіх пагадненняў, у віцебскай калоніі “Віцьба-3” экс-кандыдат у прэзідэнты Беларусі Аляксандр Казулін адзначаў уласную важную дату: 50 дзён галадоўкі. Да гэтага небяспечнага юбілею далучыліся ягоныя паплечнікі – каля 500 чалавек у Беларусі пачалі галадоўку салідарнасці.

Аляксандр Казулін пасля сакавіцкіх акцый пратэсту быў арыштаваны і асуджаны да пяці з паловай гадоў пазбаўлення волі за ўдзел у дэманстрацыі 25 сакавіка. 20 кастрычніка ў калоніі ён абвясціў галадоўку пратэсту. За 50 дзён Казулін страціў 41 кілаграм. Артэрыяльны ціск панізіўся да 75/60. Лекары кажуць, што ў гэтай сітуацыі небяспечная хуткасць, з якой ён губляе вагу. А пры такім нізкім ціску ў любы момант могуць адмовіць ныркі. Прадстаўнікі дэмакратычных сілаў Беларусі просяць Казуліна спыніць галадоўку.

У пятніцу Аляксандр Казулін перадаў на волю зварот да ўсіх дэмакратычных урадаў Еўропы і свету, а таксама да Генеральнага сакратара ААН. У сваім звароце галадаючы палітык гаворыць: “Мяне хвалюе не ўласнае здароўе, а здароўе і будучыня маёй роднай Беларусі – невялікай краіны ў цэнтры Еўропы. Я пражыў 51 год і ніяк не магу зразумець, колькі насамрэч каштуе чалавечае жыццё? Колькі каштуюць рэальная дэмакратыя, свабода і ці існуе хоць бы права чалавека на абарону ўласнага жыцця?.. Я звяртаюся да дэмакратычнай супольнасці і прашу самую дробязь – каб хоць адна з краінаў “Вялікай васьмёркі” выказала жорсткі намер вынесці на разгляд Рады Бяспекі ААН пытанне аб Беларусі і зрабіла адпаведную афіцыйную заяву. Магчыма, гэтая дробязь і вызначыць сапраўдную цану аднаго чалавечага жыцця”.

5 снежня Ірыне Казулінай дазволілі спатканне з мужам. Па словах Ірыны Казулінай, ён вельмі знясілены, але трымаецца мужна. І не збіраецца спыняць галадоўку, пакуль не будуць выкананыя ягоныя патрабаванні.

Палітрада аб’яднаных дэмакратычных сілаў Беларусі таксама звярнулася ў Раду Бяспекі ААН з просьбай разгледзець беларускае пытанне. Ад гэтага зараз залежыць не проста абстрактная будучыня краіны, але і жыццё аднаго чалавека.