Мілінкевіч: Беларусь стане вольнай на працягу двух гадоў :: Хартыя'97 :: Навiны

Лідэр беларускай апазіцыі Аляксандр Мілінкевіч упэўнены, што таталітарная краіна Беларусь за два гады стане вольнай, нягледзячы на кампанію застрашвання, якая праводзіцца Лукашэнкам. Па яго меркаванні, хоць дыктатар і прыціскае нязгодных, дэманстрацыі супраць рэжыму не спыняцца. “У сённяшняй Беларусі існуе праблема: улады робяць усё магчымае для застрашвання людзей, не толькі арыштоўваюць іх, але выганяюць з працы, з універсітэтаў… Але я не думаю, што страх пануе. Моладзь паказвае, што яна больш не баіцца КДБ”, – сказаў Мілінкевіч дэпутатам Еўрапейскага Парламента за дзень да таго, як ён павінен быў атрымаць прэмію імя Андрэя Сахарава, вышэйшую ўзнагароду ЕЗ за барацьбу за правы чалавека, піша газета “International Herald Tribune”.

“Я упэўнены, што дэмакратыя прыйдзе ў маю краіну за два гады”, – сказаў Мілінкевіч па-беларуску перад аўдыторыяй Еўрапарламента.

Мілінкевіч паспяхова прымаў удзел у выбарах у сакавіку. Ён быў супернікам Лукашэнкі. Па афіцыйных дадзеных, Лукашэнка выйграў выбары пераважнай большасцю галасоў, але апазіцыя і заходнія краіны не прызналі іх, бо яны былі сфальсіфікаваныя. Мілінкевіч узначальваў беспрэцэндэнтныя па колькасці ўдзельнікаў дэманстрацыі.

Пасля акцыі пратэсту ў гадавіну Чарнобыльскай катастрофы, 26 красавіка, у якой удзельнічалі 10 000 чалавек, ён правёў два тыдні за кратамі. За апошні час яго тройчы затрымоўвалі.

Мілінкевіч распавёў дэпутатам Еўрапарламента, што яшчэ адзін апазіцыянер, Аляксандр Казулін, які быў пасаджаны ў турму пасля вясновых акцый пратэсту, застаецца ў цяжкім стане, адмовіўшыся спыніць галадоўку, якая працягваецца больш за 50 дзён.

“Ён страціў больш за 40 кілаграмаў. Я хвалююся за яго”, – сказаў Мілінкевіч.

Мілінкевіч, па прафесіі фізік і матэматык, фігура, якая аб’ядноўвае апазіцыю, што складаецца з вельмі розных сілаў – ад празаходніх да камуністаў.

Пераклад: прэс-цэнтр Хартыі’97