Яраслаў Раманчук: «Беларусь стаіць перад вострай праблемай стабільнасці курса рубля» :: Хартыя'97 :: Навiны

“Рашэнне ўрада Расеі аб адмене льгот на нафту, якая пастаўляецца ў Беларусь, азначае спыненне датавання беларускага рэжыму. Беларусь страціць каля 3 мільярдаў даляраў. Гэта азначае, што нядаўна прыняты беларускі бюджэт, з`яўляецца пустой фармальнасцю і патрабуе сур`ёзнай рэвізіі. Уся мадэль эканамічнай палітыкі Лукашэнкі дасягнула сваёй мяжы. Беларусь зараз перад вострай праблемай стабільнасці курсу беларускага рубля. Беларускі рубель можа відавочна патаннець перад верагоднай стратай валютнай выручкі”, – заявіў вядомы эканаміст Яраслаў Раманчук, каментуючы прэс-цэнтру Хартыі’97 рашэнне ўрада Расеі аб адмене льгот на нафту, якая пастаўляецца ў Беларусь.

Па меркаванні эксперта, для звычайных людзей гэта таксама будзе мець непрыемныя наступствы. “Падаражэе бензін, мазут, дызельнае паліва, падвысяцца цэны на транспарт. Рэсурсаў для падвышэння зарплаты і пенсій не будзе. Такія падзеі прывядуць да таго, што інфляцыя можа стаць вышэй за тыя працэнты, якія абяцаюць банкі насельніцтву па рублёвых укладаннях. Сёння ўжо не так цікава, чым скончыцца газавая эпапея. Гэтага досыць, каб сказаць, што беларускі сацыялізм упершыню сутыкаецца з вельмі жорсткай рэальнасцю сусветных цэнаў”, – лічыць Яраслаў Раманчук.

Расея вырашыла ўжываць у дачыненні сырой нафты, а таксама сырых нафтапрадуктаў, атрыманых з бітумінозных парод, якія вывозяцца з тэрыторыі Расеі ў Беларусь, стаўкі экспартных мытных пошлін, зацверджаныя пастановай ад 16 лістапада 2006 года, паведамляе прэс-служба ўрада Расеі. Гэтае рашэнне прынятае дзеля “эканамічных інтарэсаў Расейскай Федэрацыі” з улікам скасавання Беларуссю пагаднення аб парадку размеркавання і залічэнняў у саюзныя бюджэты вывазных мытных пошлін на экспартуемую беларускімі прадпрыемствамі прадукцыю, вырабленую з расейскай сыравіны, ад 12 траўня 1995 года.

Паводле пастановы ўрада, з 1 снежня 2006 года экспартная пошліна на сырую нафту складзе $180,7 за тону, на светлыя нафтапрадукты – $134 за тону, на цёмныя нафтапрадукты – $72,2 за тону. Пастанова распаўсюджваецца на стаўкі вывазных мытных пошлін на сырую нафту і на асобныя тавары з нафты, якія вывозяцца з Расеі за межы дзяржаў-удзельнікаў пагадненняў аб мытным звязе.