Пратэстантам адмовілі ва ўзбуджэнні крымінальнай справы супраць журналісткі «СТВ» :: Хартыя'97 :: Навiны

8 снежня ў офіс пратэстанцкай царквы “Новае жыццё” прыйшоў ліст з Упраўлення ўнутраных спраў Адміністрацыі Цэнтральнага раёна г.Менска. У ім гаворыцца, што царкве адмоўлена ва ўзбуджэнні крымінальнай справы ў дачыненні журналісткі Л.Джураевай, аўтара тэлевізійных сюжэтаў аб царкве “Новае жыццё” на тэлеканале “Сталічнае тэлебачанне”, якія выйшлі ў эфір 14 і 15 кастрычніка 2006 г., а таксама ў дачыненні ўдзельнікаў гэтага сюжэту, начальніка аддзела па справах рэлігій і нацыянальнасцяў Менгарвыканкама А.Рабіцавай і кандыдата гістарычных навук І.Янушкевіча, “бо ў дзеяннях апошніх адсутнічаюць прыкметы якога-небудзь злачынства”.

У лісце адзначаецца, што царква мае права абскардзіць прынятае рашэнне ў пракуратуры Цэнтральнага раёна г.Менска альбо звярнуцца з іскавай заявай аб абароне гонару і дзелавой рэпутацыі ў суд у парадку грамадзянскага судаводства.

Ліст падпісаны начальнікам Упраўлення В.А.Сіняковым.

– Мы лічым гэтыя рэпартажы паклёпніцкімі, паколькі факты, выкладзеныя ў іх, не адпавядаюць рэчаіснасці і носяць правакацыйны характар, – заявіў юрыст царквы Сяргей Луканін. – У выніку грубага мантажу маіх слоў у рэпартажы СТВ прагучала выказванне, сэнс якога зводзіцца да таго, што ўсе ўдзельнікі акцыі пратэсту абавязваюцца галадаць да смяротнага зыходу.

Нагадаем, што больш за 200 вернікаў пратэстанцкай царквы “Новае жыццё” на працягу 23 дзён трымалі “пост-галадоўку”, патрабуючы ад менскіх гарадскіх улад вярнуць ім малітоўны дом і зямельны ўчастак.