Сяргей Скрабец: «Ва ўмовах турмы Казулін не зможа аднавіць здароўе» :: Хартыя'97 :: Навiны

Былы палітвязень Сяргей Скрабец, які неаднаразова правадзіў у зняволенні галадоўкі пратэсту, лічыць, што Аляксандр Казулін не зможа аднавіць здароўе ў турэмных умовах пасля 53 дзён галадоўкі. “Ён ніколі не галадаў, таму магчымыя любыя крызісныя сітуацыі. Ва ўмовах турмы аднавіць фізічнае здароўе цалкам немагчыма. Я дагэтуль не аднавіўся пасля галадовак, хоць я ўжо некалькі тыдняў на волі. У калоніі няма неабходных лекараў, няма адмыслоўцаў. Выйсці з галадоўкі Казулін зможа дзесьці за паўтара месяца – аўсяныя кашы яму перадалі, гародніна ў рацыёне зняволеных прысутнічае. Што будзе далей, складана сказаць. Адназначна, трэба патрабаваць яго вызвалення”, – сказаў Сяргей Скрабец у інтэрв`ю прэс-цэнтру Хартыі’97.

Сёння палітвязень Аляксандр Казулін у тэлефоннай гутарцы з жонкай Ірынай пацвердзіў, што спыніў галадоўку. “Ён пачаў ужываць аўсяны кісель і сокі. У яго бадзёры голас і ён гаворыць, што адчувае сябе нармальна. Яшчэ ён сказаў: “Гэта так цудоўна адчуваць, як у тваё цела вяртаецца жыццё”, –паведаміла Ірына Казуліна.

Паводле яе, Алякандр Казулін не хоча, каб яго паклалі ў шпіталь і на недахоп медыцынскай дапамогі ён не скардзіцца. Ірына Казуліна выказала перакананасць, што ейны муж сам здолее выйсці з галадоўкі.

На пытанне, як Аляксандр Казулін каментуе выкананне ягоных патрабаванняў, жонка палітыка адказала: “Нам далі паразмаўляць усяго тры хвіліны пры ўмове, што не будзем гаварыць пра палітыку. Відаць, ён паабяцаў і стрымаў сваё слова”.

Нагадаем, экс-кандыдат у прэзідэнты Аляксандр Казулін цягам 53 дзён праводзіў палітычную галадоўку. Ён пратэставаў супраць улады Аляксандра Лукашэнкі і дамагаўся разгляду беларускага пытання ў Радзе Бяспекі ААН.