Аляксандр Мілінкевіч сустрэўся з Бенітай Ферэра-Вальднэр :: Хартыя'97 :: Навiны

Еўропа гатова рэалізоўваць план эканамічнай падтрымкі Беларусі, пасля таго як у краіне распачнуцца працэсы дэмакратызацыі. Стратэгія, прапанаваная Еўрапейскім Звязам беларускім уладам, была абмеркавана сёння ў Страсбуры на сустрэчы Аляксандра Мілінкевіча з сябрам Еўрапейскай Камісіі па знешніх сувязях і палітыцы суседства Бенітай Фэрэра-Вальднэр.

Аляксандр Мілінкевіч назваў перамовы з Бенітай Фэрэра-Вальднэр надзвычай прадуктыўнымі і падкрэсліў, што спд. Фэрэра-Вальднэр “выдатна валодае беларускімі рэаліямі”. Галоўнай тэмай размовы была супольная падрыхтоўка Еўрасаюзам і дэмакратычнымі сіламі Беларусі плана эканамічнай дапамогі нашай дзяржаве.

- Гэта будзе своеасаблівы “план Маршала” для Беларусі, які ахопіць энергетычную, інвестыцыйную, сацыяльную ды іншыя сферы гаспадаркі. Еўропа канкрэтызуе сваё пасланне беларускаму народу, а мы ў сваю чаргу працуем над перспектывамі паспяховага развіцця нашай краіны, - сказаў Аляксандр Мілінкевіч.

Паводле словаў Аляксандра Мілінкевіча, Еўрапейская камісія таксама распачынае шырокую падтрымку праектаў тэле- і радыёвяшчання на Беларусь, моладзевых абменаў, праграм падтрымкі рэпрэсаваных.

Нагадаем, што Еўрапейскі Звяз гатовы істотна павялічыць аб’ём дапамогі Беларусі пры выкананні беларускімі ўладамі шэрагу ўмоў. Еўразвяз прапаноўвае спрашчэнне парадку ўезду грамадзянаў Беларусі ў ЕЗ, садзейнічанне беларускай эканоміцы, падтрымку малога і сярэдняга бізнэсу і падрыхтоўку беларускіх прадпрыемстваў да працы на еўрапейскім рынку.

ЕЗ таксама прапаноўвае дапамогу ў рэформе судова-прававой сістэмы, у мадэрнізацыі транспартнай і энергетычнай сетак. Акрамя таго, Еўразвяз мае намер прапанаваць беларускім студэнтам падвышэнне стыпендый пры атрыманні адукацыі ў еўрапейскіх універсітэтах. Акрамя таго, ЕЗ прапаноўвае павялічыць фінансавую дапамогу.

У адказ ад Беларусі Еўразвяз патрабуе: вызваліць усіх палітычных зняволеных, расследаваць справы выкрадзеных палітыкаў і журналіста, правесці свабодныя і справядлівыя выбары, спыніць умяшальніцтва ў працу судоў, даць беларусам магчымасць атрымоўваць незалежную інфармацыю, не ўмешвацца ў прыватны бізнэс, паважаць правы грамадскіх арганізацый і незалежных прафсаюзаў, захоўваць правы нацыянальных меншасцяў.