ЗША занепакоеныя пазіцыяй Расеі па фармаванні цэнаў на энерганосьбіты для Беларусі :: Хартыя'97 :: Навiны

Афіцыйны прадстаўнік дзярждэпартамента ЗША Шон Маккормак выказаў занепакоенасць пазіцыяй Расеі па фармаванні цэнаў на энерганосьбіты для Беларусі. “Мы ўжо казалі аб нашай занепакоенасці ў дачыненні Расеі раней – ні адна краіна не павінна спрабаваць выкарыстаць энергетыку ў якасці зброі”, – заявіў Ш.Маккормак падчас брыфінгу ў Вашынгтоне, адказваючы на пытанне журналістаў аб адносінах ЗША да рашэння расейскага ўрада ўвесці з 1 студзеня 2007 года экспартныя пошліны на сырую нафту для Беларусі.

Ш.Маккормак адзначыў, што “пытанні такога тыпу павінны вырашацца на аснове рынкавых механізмаў і ў рамках агульнапрынятых міжнародных кантрактных нормаў, якія датычацца гандлю вуглевадародамі”. У той жа час ён адзначыў, што датычна новай сітуацыі па пастаўках нафты з Расеі ў Беларусь ЗША пакуль “не валодае ўсімі фактамі” і таму можа казаць аб палітыцы ЗША толькі ў цэлым.

“Мы раней бачылі паводзіны (з боку Расеі – “ІФ”), якія выклікалі некаторую занепакоенасць. Я не магу сказаць, што ў дачыненні Беларусі гэта зараз мае месца, аднак пытанне такое узнікае”, – заявіў старшыня дзярждэпартамента ЗША.

Як раней паведамлялася, Расея з 1 студзеня 2007 года ўводзіць пошліну на пастаўкі нафты ў Беларусь у памеры $180,7 за тону. У цяперашні час расейская нафта пастаўляецца ў Беларусь бяспошлінна ў рамках пагаднення аб стварэнні Мытнага саюза.