Ірына Казуліна: «Зараз я рэальна бачу, што чагосьці мы дамагліся» :: Хартыя'97 :: Навiны

Жонка экс-кандыдата ў прэзідэнты Беларусі, палітвязня Аляксандра Казуліна ўдзячная амерыканскаму прадстаўніку за спробу ўзняць беларускае пытанне ў Радзе Бяспекі ААН. “Я удзячная прадстаўніку ЗША у Радзе Бяспекі ААН за спробу падняць пытанне правоў чалавека ў Беларусі і галадоўкі Аляксандра Казуліна, – заявіла Ірына Казуліна. – Зараз я рэальна бачу, што чагосьці мы дамагліся. Было вельмі шмат скептыкаў, якія сцвярджалі, што тэму Беларусі ў Радзе Бяспекі ААН узняць нерэальна, што гэтага ніхто не будзе рабіць... Тым не менш гэтае пытанне прагучала. Гэта значыць, што Аляксандр нездарма мучыў сябе галадоўкай”.

12 снежня прадстаўнік ЗША у Радзе Бяспекі ААН Уільям Брэнік прапанаваў Радзе Бяспекі абмеркаваць сітуацыю з галадоўкай А.Казуліна. Ён адзначыў, што трэба ўважліва сачыць “за ўрадам Беларусі, які парушае асноўныя правы і свабоды”.

І.Казуліна спадзяецца, што сусветнае грамадства і, у першую чаргу, Еўрапейскі Звяз будуць працягваць дамагацца вызвалення яе мужа, які адбывае пакаранне ў калоніі “Віцьба-3”.

І.Казуліна паведаміла, што сёння тэлефанавала ў калонію з мэтай даведацца пра стан здароўя мужа. “Мне сказалі, што ўсё ідзе па плане. Аляксандр здаў аналіз крыві, і мне паведамілі, што з гэтым аналізам усё ў парадку”, – сказала яна.

Нагадаем, што 15 снежня мусіць адбыцца спатканне Аляксандра Казуліна з адвакатам Ігарам Рынкевічам.