Украіна пагражае пакінуць Беларусь без святла і цяпла :: Хартыя'97 :: Навiны

Дзяржаўнае прадпрыемства “Укрінтерэнерга” можа спыніць пастаўкі электраэнергіі дзяржаўнаму канцэрну “Белэнерга” у 2007 годзе. Аб гэтым паведамляюць “Українські Новини” са спасылкай на інфармаваную крыніцу.

“Як мне вядома, Украіна наогул можа спыніць экспарт электраэнергіі ў Беларусь з 1 студзеня, калі “Белэнерга” не згадзіцца з падвышэннем цаны”, – сказала крыніца. Паводле паведамлення, “Укрінтэрэнерга” накіравала ў лістападзе дзяржаўнаму канцэрну “Белэнерга” ліст з адпаведным папярэджаннем.

Бакі яшчэ не дамовіліся аб аб`ёмах і цэнавых параметрах экспарту электраэнергіі на 2007 год. Раней Мінэканомікі рэкамендавала “Укрінтэрэнерга” падвысіць кошт электраэнергіі, якая экспартуецца ў Беларусь.

Нагадаем, міністр паліва і энергетыкі Юрый Бойка заявіў аб намеры Украіны перагледзець кантракты ў бок падвышэння цаны электраэнергіі для замежных партнёраў. Паводле загадаў Міністэрства эканомікі, з 1 верасня 2006 года экспарт электраэнергіі з Украіны здзяйсняецца па цане не менш за $0,026 за квт-гадзіну, пры пастаўках у Беларусь – па цане не менш за $0,021 за квт-гадзіну. 15 снежня 2005 года “Укрінтерэнерга” і дзяржаўны канцэрн “Белэнерга” падпісалі кантракт на пастаўку 2,5 млрд. квт-гадзіну ўкраінскай электраэнергіі ў 2006 годзе. Аб гэтым паведамляе proUA.com.